Ongudu yovashingi voutaksi monooli paife ohava lotoka va uka kuNgungula kOshikango tava ka nwefa omahooli. 

Ova hokolola tava ti kuNgungula xwepo shaashi omahooli oku na ombilixa shi dulife okunwefa poitaashi yomahooli moNamibia. 

Endini leelitela 20 kuNgungula oli na N$500 omanga okandini keelita nhano oke na N$100. 

Ovanhu ovo ve li ovanashilonga navo ohava shingi eetuwa davo paife tava ka nwefa omahooli kuNgungula. 

Oshivike sha dja ko epangelo ola shivifa pambelewa kutya ondado yomahooli otai wedelwa. 

Onghundana ei oya eta ovashingi voutaksi opo va kale tava nyenyeta nosho yo okukufa onghatu yoku ka nwefa omahooli kuNgungula. 

Edina Ngungula ola dja kOvaangola eshi tava lotoka va humbata oundini vomahooli, hano tava ngungula alushe ngeenge va mona opolifi. 

Opolifi otai longo nelitulemo okukala tai tataa Ovaangola opo vaha landife omahooli pamukulo woumbudi ashike paife onghalo yaNgungula oya pimbila unene. 

Mwetufa Hango, ha shingi otaksi okwa hokolola ta ti ove na ashike oku ka nwefa omahooli kuNgungula shaashi oku na ombilixa. 

“Nafye mopate otu li mo hatu kondjo okulonga okamaliwa ketu ashike ngeenge omahooli okwa ninga ondilo nena oshimaliwa shihapu hatu longo osha uka ashike momahooli,” ta ti. 

Natango omushingi wotaksi umwe, okwa hokolola ta ti paife oha dimbuka e na oshimaliwa shihapu shaashi oha nwefa omahooli kuNgungula oku ku na ombilixa. 

Paife ngeenge owa i kOshikango oto hange ko ovashingi voutaksi ve li momukweyo ve ya okunwefa omahooli kuNgungula. 

Ovaaangola ngeenge ova mono opolifi ohava faduka po va uka moixwa ve kwete omandini omahooli. 

-fhamalwa@nepc.com.na