Omupeduminista woshiwana sha findilwa pedu novanhu ovo kwa li va talika ko ve li konima yefina Royal //Ui/oo/oo okwa kumaida oshiwana shovayelele opo shi xulife po okulongifa oshimaliwa moikolwifa.

“Kaleni tamu lande oikulya noipumbiwa yomomaumbo,” ta ti.

Edi //Ui/oo/oo okwe di popya pefimbo a talela po oshiwana shovayelele komukunda Olukula moshikandjohoololo shaKongo Omaandaxa.

Omupedu minista okwe lipyakidila nokutalela po oshiwana shovayelele koikandjohoololo ya yooloka mOhangwena.

Elalakano okudidilika omashongo aa taalelwa kovayelele noshoyo oku va twa omukumo opo va kwate nawa oshimalilwa shavo shopendjela.

Okwa didilikwa ovayelele hava longifa oshimaliwa shavo shopendjela moikolwifa.

Okwa lombwela ovayelele opo vaha longe oimbuluma noshoyo okukala nombili momidingonoko davo.

//Ui/oo/oo okwa ti osha fimana opo oshiwana shovayelele va ye kofikola opo va dule okukala ve shi okulesha nokushanga.

“Ofikola oya fimana. Ovakulunhu tweni ounona veni omukumo opo va ye kofikola. Ounona inava kala vali keendingosho,” ta ti.

Okwa ti ombelewa yaye otai twikile okuyambidida oshiwana shovayelele nokukwashipaleka kutya ovayelele ove li meameno.

“Oufemba wovayelele nau fimanekwe ngaashi naanaa ovanhu aveshe,” ta ti.

Okwa kumaida ovayelele opo va ka kufe ombinga oku ka hoolola neudo muNovomba molwaashi osha fimana opo va longife oufemba wavo.

Pefimbo ve li komutumba ovayelele ova lombwela omupeduminista tava ti ova pandula epangelo molwaashi ohava pewa oshimaliwa shopendjela.

Ova popya tava ti ove na nomeva  a yela komukunda wavo.

-fhamalwa@nepc.com.na