Omayuva womasuviro nga ozondjira maze hungama kOmaruru, Okahandja na Zombuzovindimba erero, tjiyari yevari ku Seninaṋi, azautirire mOtjomuise.
KOmaruru ku nomayamberero wombura aihe wOtjizemba nge kara ko momautiro wa Seninaṋi oyo ombura ndji nai nga tjiti ozombura o-99 nombura ndji mai yende ngu maye tjiti ozombura esere.
KOzombuzovindimba na Kahandja okuzemburuka tji ye ri yevari ku Seninaṋi mo 1904 ehi rOvandoitji eehuure oruveze ndo okutuurungira momunane worupa rwovita raro mOsouth west Afrika Onamibia otja tjaari tjiukwa oruveze ndo, Lothar von Trotha tja tjivisa komuhoko na kouye kutja Ovaherero ngave yandekwe. Oro von Trotha nda tjiukisira pondunduvahi pOzombuzondimba.
Mo 2004, ndjari ombura yomazemburukiro wozombura esere (100) zOtjiṱiro Otjindjandja ozondekurona otji za uta okuzemburuka eraa ra von Trotha romayandekero womuhoko okurizemburuka tji ye ri yevari komueze Seninaṋi pOzombuzondimba pu ra yandjerwa.
Okuza mbo otji ri zemburukwa ombura aihe. Nomarongerisiro nomasembamisiro nomazemburukiro waro i yOkomiti yOtjiṱiro Otjindjandja ndjaai ungurire kehi yomauhonapare pekepeke wombazu mu mwari Ouhonapare wOmbazu wOvaherero kehi yombara Otjitambi omuyaruke Kuaima Riruako nOwovambanderu rutenga kehi yOmbara omuyaruke Keharanjo II Nguvauva nu kombunda ngandu kundino ndi kehi ya Aletha Nguvauva.
Otjimbi tjOtjiṱiro Otjindjandja itji otji tja twara komatungiro wa zOmbuzondimba otja tji ye munika nai.
Ngari orukondwa orutenga uriri ngunda orutjavari ngahino kutja okururi maaru keya ombura iṋe. Posi ya tji tjiri otjiṋa ozondekurona nḓu ze kondja nazo nai ku na Otjirata tjOvirumatwa Vyehi (National Heritage Council, ONHC).
Tjingetjo ozondekurona zarwe zOuhonapare wOmbazu wOvaherero kehi yOmbara Otjitambi Onongo Mutjinde Katjiua omayuva womasuviro nga ze novitjitwa ongondoroka wina nomayuva tji ye ri yevari ku Seninaṋi. Ovyo mbya utire erero mOtjomuise.
Norukongo pehi okuyenda kotuveze pekepeke tjimuna Omberoo yOmukuramenepo wEhi rOvandoitji, Ombongo yOruhundo meṋe yo Alte Feste nOmuhaamise wOmbongarero yOtjiwaṋa.
Ngunda ozondekurona kehi yEhika ra Kandjoze aza zuvasana kokutja avihe mbya tjama nOtjiṱiro Otjindjandja mavi wire kehi yondyero yehika ndi, navi tyewa iro, tji kweya kOzombuzovindimba mape munika ayo ngunda ovimbumba kavi ya twara ourizemburuka kumwe kutja omazemburukiro waro ye kare kehi yOtjikandjoze.