Otjivike tjomazemburukiro wEyuva rOmazemburukiro wOtjiṱiro Otjindjandja, ombura ndji mari kara ko Oritjatatu omayuva tji ye ri o-28 komueze mbwi Kambundu, ozondekurona zOvambanderu nOvaherero ze netando mOtjomuise.
Ombura ndji, ootjikando otjitenga ohoromende okusembamisa eyuva ndi ngunda ozondekurona ozeni aza utire okurizemburuka mo-2023. Ozombura hambombari ape kombunda yOkaṋepo kOswanu mOmbongarero yOtjiwaṋa oruveze ndo, Usutuaije Maamberua, tja hitisa ombepo yokutja omayuva tji ye ri 28 ku Kambundu, ri rire Eyuva rOmazeburukiro wOtjiṱiro Otjindjandja. Oro ombura ndja zuko ohoromende ndi ya varere nao kotjiveta.
Mu nao otjeyuva ozondekurona nḓu za uta okuzemburuka rukuru, tjingetjo wina ombura indji otji ze hi nokumwina uriri nokupata omake mumwe. Nungwari maze rizemburuka otja kuzo tji tja rira otjitjitwa tjombura aihe otjorupa rorukosi rwazo rwOtjisuta. Okutja Oritjavari tji ye ri 27 komueze mbwi, ondjuwo yetando otji mai paturuka poruveze rovitjitwa rOmihoko Omikutasane ndu tjiukwa otjOuno Plaza. Ozondekurona aze rara nomutambo ependukirwa tji ye ri o-28 ku Kambundu ondjuwo ai pitwa ozondekurona aze kerikwamba komazemburukiro omanenenene ngeri kehi yOhoromende. Tjiyaanuka aze kotoka poruveze pu pari netando okupata eyuva auhe ma yaruke ka zu. Ondando oyo kutja ngamba imba mba ṱa mOtjiṱiro Otjindjandja kave na indu va rirwa. Pendje netando ombura ndji, ndi mari honaparerepo ovitjitwa pondondo yozondekurona, wina Oritjavari tjingero mape kara otjihungiriro tji matji sosonona kutja tjii hapo Omazemburukiro nOtjisuta maye hitasana vi? Mu vyarue pekepeke.
Ngunda ape ri nao ohoromende wina ya uta okurongerera eyuva ndi tjinga aya hinda otuhindo mehi motukondwa pekepeke okukanongonona kutja tjii hapo ozondekurona atja ze zera kutja eyuva ndi atja ve zera kutja ohoromende i risanise pi novo wina atja ve zera okukara norukeerupa muro. Imwe yozombongarero zohoromende okuza mOmberoo yoperesindenda yOkehi yeekusenina mOtjomuise Oritjatano nda zuko puyo pu pa ri ovanane vombazu okuza mOkhomasa ovahungire vOtjiṱakume nOtjikwena.