Omukwaniilwa gwOndonga Shuumbwa Nangolo okwa kumagidha omazimo ga simaneke aathigwa po ayehe, uuna gumwe gwomaahokanathani a hulitha. Nangolo okwa yelitha kutya mekotampango lyomalelo gwopamuthigululwakalo aaselekadhi, naaselelume oya gamenwa noya pumbwa okusimanekwa konima yo maso gaaholike yawo. Ohole yoku thigulula oyali ya topola omazimo ogendji, oshoka ngele omulumentu okwa si kehe gumwe ohakala e uvite kutya okuna uuthemba oku thigulula po egumbo moka mwa si omulumentu.
Moonkundana naKunduna ongula yOmaandaha omukwanilwa Fillemon Shuumba Nangolo okwali a fatulula ta ti, aaselekadhi okwali haya taalele omashongo ga yooloka, okuza kaakwanezimo yaasaane yawo ngele ya si, ihe ngaashi ngeyi ihashi pitikwa we.
“Ehumo komeho otali ende lyuuka komeho, noomapngo dhimwe odha lunduluka. Uuna Omusamane mwene gwe gumbo a hulu ko, ka pena we oonkundwa dhimwe, ihe oshili po nale kutya egumbo olyo muselekadhi naanona,” ta ti ngaaka.
Nangolo ta popi ta ti, uuna aakuluntu ayehe ya hulu ko, egumbo ohali pewa aanona ayehe, ihe itali pewa omulumentu gwonkelo nenge ngoka eli po omushona, ngaashi muuyuni gwonale.
Ta ti, oompango dhoka odhali dha lundululwa okuyanda omaupyakadhi haga taalele aaselekadhi okuza kaakwanezimo ya nakusa. “Aanona oye na uuthemba okukala megumbo lyaakuluntu yawo sigo aluhe. Oshili mondjila aluhe uuna aalumentu taya hokana ya kale yena omitunda dhawo yene, opo ya yande omayipumo mumwe po kati komuselekadhi noosuwala ya thigwa mweegumbo kaakulutu yawo,” akumagidha.
Omukwanilwa okwa gwedha po ta ti, shoka ihashi holoka ashike kaakiintu, ihe opena mboka haya eta aalumentu momagumbo muna aamwayina, nuuna omukiintu a hulu ko omulumentu ngoka ota ningwa ngiini, ta pula.
Sho taku popiwa aanona ayehe, itaku popiwa mboka wa valwa mohombo komukulukadhi nomusamane, ihe otaku popiwa uunona awuhe wa kala megumbo moka, kutya inawu valwa komukulukadhi ngoka.
“Ngele omwa kala muli nasuwala gweni nawa, kaamuna uupyakadhi natango ko nima yeso lyomuholike gwe, tsikilileni ashike nombili nelandulathano lya kala po,” ta popi ngaaka.