WINDHEOK-Dj Roxy ngoka a tseyika nawa onga oye gumwe gwomooDj daakiintu dhingi moshilongo, okwa tseyitha ta ka tula uukuni kumwe pamwe naahikingalo dhingi moshilongo oku eta po ongalo ye yokutyapula efudho lyaDesemba.
Dj Roxy okwa ti ye ota ka imba pamwe naahikingalo ngaashi TopCheri, DJ Alba, Loski naMarven oku eta po ongalo yedhina Eish Bra. Ndjika oyo ongalo yimwe ya tengenekwa oku ka dhana onkandangala efudho ndika enene twa taalela.
Dj Roxy, nedhina pakuudha Rosalia David, ngoka e li ashike e na oomvula 28 okwa li a pititha okangalo ke kotango omvula ndjika kedhina Somebody, moka a li a kwathelwa okwiimba kuSam E Lee Jones. Ongalo ye ndjika oya kala nokudhana mooradio konyala adhihe dhomoshilongo, noya kala yi li ponomola yotango methigathano lyoDrums of Africa koradio yoEnergy 100FM, uule woomwedhi mbali dha ka pita.
Manga a li inaaya mehangano lyokuDj, Dj Roxy okwa li omuwiliki gwoopolohalama dha yoolokathana koradio yoBase FM, ye okwa li ishewe ha kwatele oongalo dhaahikingalo yongundu yoFullforce komeho.
Edhina lye okwa li e li tseyitha pethimbo a li ha dhana oongalo pooklaba dhomoshilando ngaashi Steakhouse, Chez Ntemba VIP, Club London, Chopsies, Parks lounge, Vibe poLoft, nokwa kala ishewe noku Dj pamwe nooDj yopondje yoshilongo ngaashi DJ Zinhle naDj Lesoule.
Okukala kwe mehangano lyoongalo Dj Roxy okwa kala nokudhana oongalo pamwe nooDj ngaashi KFC Days, Desert Storm, Kboz, Dj Charlie, Afroberies, Dj Romeo, Dj Ambeezy noyendji ya gwedhwapo.
Kakele ashike okukala kwe moongalo, Dj Roxy okwa li ishewe oye omutoolinkundana gwoonkundana dhomainyanyudho koshifokundaneki shoThe Villager, osho woo Windhoek Observer.
Oku li ishewe omushangimambo, nomuDesemba ota ka pititha embo lyedhina Belinda. Omvula tayi ya okwa tokola oku ka taandelitha oshitalenti she shokuDj, nokuninga oongalo tadhi nyanyudha notadhi ndaaniswa koyendji.