Omulumenhu weedula 48 okwa fya konima eshi vati e limangelekela meumbo laye momukunda Iilambo moshitukulwa shaMusati.
Nakufya okwa tongololwa oye James Stephanus omukalimo womomukunda Iilambo.
Otaku hokololwa kutya Stephanus okwa dja keendingosho efimbo lokonguloshi nokonima okwa tameka okutaataa ovaneumbo vaye e kwete oikulumbwati.
Omukulunhu koshikondo shokukonakona oimbuluma mopolifi moshitukulwa shaMusati Omupudukomufala Moses Simaho okwa hokolola ta ti Stephanus okwa ifanwa kounona vaye a ka lye ouvalelo ashike okwa anya. Okudja opo vati okwa lombwela ovaneumbo laye kutya ote va dipaa ndele naye te lidipaa ye mwene.
Opolifi oya hokolola tai ti molwomatilifo oo, omulumenhu ou okwa kufa eedibo a yuka mofamili yaye. Ovaneumbo, mwa kwatelwa omukulukadi waye ova faduka po va yuka mepya.
Okudja opo vati Stephanus okwa kufa ongodi nokulimangelekela monduda yaye yokunangala.
Opolifi oya hokolola tai ti konima yefimbo eshi ovaneumbo va alukila meumbo ova hanga olutu laye li li meemhango, a xulifa nale.
Oshiningwanima shikwao, omulumenhu 33 weedula naye okwa fya eshi vati e limangelekela momuti u li mekove lambulavo.
Nakufya okwa tongolwa oye Immanuel Matias omukalimo womomukunda Okathitu kaNangombe moshitukulwa shaMusati.
Opolifi oya hokolola tai ti Matias vati okwa kala ta mono oixuna ehe na apa tadi konima eshi a tewa meumbo lovadali vaye kuina mumwaina waina.
Omakonakono opolifi otaa twikile moikumungu aishe yomalidipayo.
fhamalwa@nepc.com.na