ONGWEDIVA – Ongeleka nayo paife oya waimina eengudu odo da twala omanyenyeneto ado kepangelo omolwetokolo la ningwa komhangu ya shiya ko moshilongo opo Namibia a valule paveta eehombo domashenge da dikilwa kondje yoshilongo.
Ovaleli vopamhepo vahapu moNamibia, mwa kwatelwa ovabiishofi vongeleka yakula moNamibia yoEvangelical Lutheran Church (ELCIN) ova tuma omikandakemo davo kepangelo, omanga vamwe va tameka okwoongela omawi kovakwamhepo vakwao opo va tume ekandeko lavo kovaleli voshilongo.
Ovabiishofi mwa kwatelwa ava ve li moipundi yetulumuko oshoyo ovatonateli voikandjo yaELCIN, ova nyola kutya Namibia ke li kuye mwene, no ina hala okulandula omaliudo aye mwene ngaashi oilongo ikwao yomuAfrica yooKenya naUganda.
Tava ti oshilongo osha hala unene okukala she likolelela koilongo ihapu yokondje. Ovabiishofi ve li moipundi yetulumuko ova popya kutya ongeleka yaELCIN oya hangika nale i li omhinge noushenge omanga inau tambulwa ko paveta moNamibia.
ELCIN ota pula omhangu opo i alulule etokololo layo. Ongeleka oya pula yoo epangelo opo li pe oshiwana omhito yokuyandja omaliudo asho kombinga yoshinima shoushenge.
Dr Shirley Magazi, ta kwatele komesho exwata leengeleka di li omhinge noushenge tali liufana Coalition of Christian Churches, okwa tula okavidio komalungula ta pula opo oshiwana shi fikame nokuyandja ewi lasho kombinga yoshinima shoushenge.
Magazi ta pula opo oshiwana shi shaine omukanda u li komalungula, opo shi holole omhinge netokolo lomhangu. Ta ti otava kongo omawi e li 100 000.
Magazi okwa ti nonande etokolo olo oli kale la ningwa komhangu ya shiya ko moshilongo, ekotamhango loshilongo olo kamana, nomhangu oi na okuliufa kulo.
Magazi okwa weda po yoo kutya momafiku 02 Juni ove na okuyandja omushangwakemo wavo kepangelo, wa shainwa u li omhinge noushenge mwa kwatelwa etaleko leehombo davo paveta notau holola ewi loshiwana.