Okanona komimvo ntano oka li ka si eso linyanyalitha sho ka lyatwa koshihauto sigo omeso omanga ka li kohi yoomposi ka li ka lala kohi yomuti.
Oshiningwanima shoka osha ningilwa nduno pomukunda gwedhina Oshalembe moshikandjohogololo shEtayi moshitopolwa shaMusati ehuliloshiwike lya zi ko mOlyomakaya, lwopotundi 13h50.
Shi ikololela kuuyelele wa gandjwa komugandjimulombo gwopolisi moshitopolwa omo tuu moka Inspector Lineekela Shikongo, omuhingi gwoshihauto shoka ngoka ke na ombapila yokuhinga okwa li ta hingi ta zi komukunda gwedhina Okanwa uuka kOshalembe, kopate yopevi.
Shikongo okwa ti kutya ngoka okwa lyata nduno okanona hoka nohauto oyo tuu ndjoka ee ta ka mono oshiponga komutse ee taka kondekelwa koshipangelo shaKatoolika shaShikuku nokonima okanona oka mana uuyenda wako wokukala kombanda yevi.
Omuhingi ngoka ngashingeyi okwa patululilwa oshipotha shokuhinga nuuhasha noshowo shedhipago lyaashi lyoshiningilawina.
Omunamimvo 22 ngoka a za komukunda gwedhina Oshivanda Shanghatanga, moshikandjohogololo shoka sha tumbulwa pombanda moshitopolwa tuu omo moka, ina ninga nande okapalu pethimbo lyoshiponga shoka. Shikongo okwa ti omuhingi ngoka ngashingeyi okwa mangwa po noku li nale mondholongo nokwa tegelelwa a holoke mompangu yaMangetalata mOutapi nena (mEtiyali). Nakusa oye nduno Elizabeth Shilongo ngoka a za kOshalembe nomazimo gopaali agehe oga tseyithilwa nale oshinima shika.