“Onda dopele ondodo onhi-10 noitwa i li 20 momudo 2006, nonghalamwenyo okwa li idjuu neenghono. Onda kondjifa okuninga oNamcol ashike kemanya kudja ondwi, ashike inandi sholola tuu nande, alushe onda kala ndi na ondjodi yokuninga ongeshefa yange mwene”.
Aa omatumbulo omulumenhu weedula 36, Simon Nakapolo ta popi olweendo laye nghene e shi pondola opo a ninga omunangeshefa.
Konima eshi a dopa Nakapolo okwa kala ha kulula ovanhu poundingosho vopopepi neumbo lavo ve li momukunda Onanghali, moshitukulwa shaHangwena.
Momudo 2008 okwa ya moushimba koArandis opo a shiive a ka konge oilonga.
“Eshi nda fika moushimba onda kala nokukonga oilonga ashike ihandi mono tuu nande. Konima onda ka ehela omumwamememati opo a kwafele nge eshina laye opo ndi kale handi kululifa ko, manga handi kongo oshimaliwa shoku landa lange mwene,” Nakapolo ta ti.
Nakapolo eshi a tameka okukulula moushimba ota ti okwa kala nokulonga noudiinini.
Omulumenhu ou osho a lande eshina laye nokuninga onhele yaye yokukululila moushimba.
“Eshi nda landa eshina onda ninga onhele yange yokukululila omu nda yandja oilonga kovanyasha. Onhele onde i topola meenduda nhatu, omo nda ninga mo okafitola kokuteleka oikulya, onduda yokukululilwa, onduda yokufanekelwa ovanhu ngeenge va hala omafano,” Nakapolo ta ti.
Mopaife ngaha Nakapolo okwa landa notuwa yaye yandja mongeshefa yaye. Momudo 2019 Nakapolo okwa landa onhele yedu mOndangwa opo paife a tunga po eenduda daye tadi hiilwa kovanhu.
“Nonande nda taalela omashongo onda longa nelitulemo opo ndi kwashipaleke kutya onde shi pondola moilonga yange shaashi oshi pewa shange okuninga omunangeshefa,” Nakapolo ta ti.
Nakapolo okwa twa ovanyasha vakwao omukumo unene tuu ava va dopa mofikola opo va kale tava tameke oungeshefa vavo vashona ngaashi naana naye eshi a tameke onga omukululi.
Nakapolo okwa ti ovanyasha nava kale kokule nookaume vapuka shaashi oshili shanyika oshiponga okukala nookaume va puka.
“Okudopa ofikola itashi ti kutya ove elai, ile itashi ti kutya ove itodulu okweetaposha, onghee ovanyasha vakwetu otwa pumbwa okulongifa ounongo wetu opo tu dule oku limonena oshimaliwa shetu shomondjato,” Nakapolo ta ti.