OSHAKATI - Omupeduprimaminista Netumbo Nandi-Ndaitwah okwa ti osha fimana ngeenge oshiwana tashi pewa ehongo nouyelele kombinga yelongifo leendjila opo kukelelwe oiponga yomeendjila.

Edi oda tongwa moshipopiwa shaNandi-Ndaitwah sha leshwa ponhele yaye kungoloneya waShana Elia Irimari momutumba wovakainhu mOshakati mEtine.

Ehangano lokuungaunga noiponga yomeendjila loMVA Fund otali ningi   omutumba wovakainhu omo ovakainhu tava pewa ehongo nghene ve na okulongifa eepate ngeenge tava shingi.

Omutumba otau xulu nena, notau ningwa lwoshikando oshitine.

Nandi-Ndaitwah okwa indila omahangano a yooloka ovahongifikola keefikola opo va kale tava yandje ehongo moshiwana kombinga yelongifo leepate.

“Omukainhu ngeenge okwa kala e na eudeko la wana nghene e na okulongifa opate, ota dulu yoo vali okuyandja ehongo kovakainhu vakwao ile kovalumenhu,” ta ti.

Okwa pandula ehangano lo-MVA Fund eshi tali twkile nokushunifa pedu oiponga yomeendjila tashi pitile mokuninga oikonga yehongo.

“Ihashi ulike efano liwa ngeenge moshilongo tamu lopotwa ovanhu va kanifa eemwenyo ile va lemana,” ta ti.

Moshipopiwa shaye omunambelewawiliki wehangano lo-MVA Fund, Rosalia Martins-Hausiku okwa ti konima yomido nhatu da pita oiponga yomeendjila oya shuna pedu.

Okwa ti MVA Fund ota twikile nokuninga oikonga yokuyandja ehongo nouyelele moshiwana molwaashi osha fimana opo omulongifi wopate keshe a kale e na eudeko.

Martins-Hausiku okwa ti omutumba ou owa fimana koomeme molwaashi otau va xwaxwameke va tumbalekwe noshoyo mokukufa ombinga moipambele yelongifo leendjila. 

“Oiponga  yomeendjila otai shuna pedu ngeenge ovanhu tave liufa komadidiliko omeendjila,” ta ti.

Onghee okwa kumaida ovakainhu opo ve liufe komiladu odo da tulwa po domeendjila efimbo keshe.

fhamalwa@nepc.com.na