Omukiintu gwomimvo 43 ha longele ehangano lyokukeelela omaliko lyoShilimela Security, anuwa okwa dhengwa nokuyugwa ongodhi ye yopeke omanga inaa kwatwa koonkondo.
Oshiningwanima shika osha ningilwa posikola yimwe moshitopolwa shaOtjozondjupa Etitano lya zi ko.
Sha ikwatelela kepeko lyopolisi oshiningwanima shoka osha holoka potundi 21h00 yuusiku, posikola Otjiwanda sekondele momudhingoloko gwaGrootfontein.
Otaku hokololwa kutya omukiintu ngoka okwa li a ponokelwa komulumentu ngoka inaakoneka koshipala ete mu dhenge noshiti omanga inemu kwata koonkondo.
Opolisi tayi hokolola kutya, omulumentu ngoka okwa li ayi ontuku nongodhi yopeke yomukiintu ngoka.
Ta yi ti, omukiintu ngoka ka kwali a vulu okwiigamena oshoka ka kwa li ena oshilwitho, nonando ethimbo lyoshiningwanima shoka sha holoka okwa li e li miilonga.
Opolisi otayi indile moshigwana ngele opena ngoka ena uuyelele mpoka pena omuntu ngoka alongo omiyonena dhafa mpoka, alopotele opolisi yi li popepi naye..
Moshiningwanima iinashifaathana, omukiintu gwomimvo 29 okwa si sho ayi nomeya Olyomakaya ga zi ko mOvenduka.
Opolisi oya ti, shiningwanima shoka osha holoka ookilometa 30 okuthika mOvenduka.
Otaku hokololwa kutya omukiintu ngoka okwa li pamwe nakuume ke koomihole ngoka a li tahingi ohauto yo bakkie, gwomimvo 73.
Ta yi ti, ohauto ndjoka okwa li yafalelwa komeya pontopa mpoka kwa li pwa kankuka komeya gwomvula, ndjoka kwa li ya ningi esiku tayi loko moshilondo.
Otaku hokololwa kutya omulumentu ngoka okwa li atatula ekende lyohauto lyokomeho opo amone ompito yoku zamo.
Ta yi hokolola kutya, manga a li metifa okuhilamo omuholike gwe mohauto nelalakano lyokumuhupitha, okwa li adhengwa komuti ngoka kwa li tagu tondoka nomeya, no kwa li sha etitha emweethe. Opolisi ta yi ti, omulumentu ngoka ina vula we okulandula ohauto, oshoka omeya okwa li taga tondoka unene. Nakusa okwa li a adhika ahakela momuti gu li momeya esiku lya landula.