Caroline Namhindo omukalimo womukunda Ohalushe okwa limbililwa kokaana kaye kokaadona oko vati ka ninga omafiku ahamano ka kana. 

Otaku hokololwa Caroline Philemon weedula 15 e li mondodo onhi-8, pofikola BH Mwandingi Combined School a fiya ovadali vaye momalimbililo eshi vati a dja meumbo Olomakaya loshivike sha dja ko efimbo loufiku lwopotundi 21h00 ashike vati ovadali vaye kave shi kutya oku li peni fiyo onena. 

Opolifi moshitukulwa shaHangwena oya ninga eenghendabala dokukonga Philemon moRadio ashike kape na ouyelele kutya oku li peni. 

Namhindo ou e li ina yokaana okwa hokolola ta ti ova ninga eenghendabala dokukonga omona momikunda da yooloka noshoyo okupulapula movakwapata ngeenge Philemon okwa fika ko komaumbo avo. 

“Fiyo opaife xe oku li molukongo lokukonga omona. Otwa tila kutya okaana ketu oke li peni paife,” Namhindo ta ti. 

Namhindo okwa weda po ta ti ove na oumbada shaashi ounona voukadona paife ova ninga oihakanwa yokulongelwa ominyonena kovalumenhu ngaashi okudipawa nokukwatwa onghonga. 

Onghee paife otave lipula kutya pamwe okaana kavo oka longelwa omunyonena ndele taka kupulwashi. 

Okwa indila moshiwana kwaau e na ouyelele opo oshiwana shi kale sha lopotela opolifi keshe i li popepi ile oshiwana shi kwatafane naye konomola yongodi yaye +264814879449. 

fhamalwa@nepc.com.na