Omunambelewa wopolifi okwa fya eshi a yashwa nondjebo komupolifi mukwao Etitano efimbo lokonguloshi.
Oshiningwanima eshi osha ningilwa pondingosho molukanda loSingle Quarter moWindhoek.
Nakufya okwa tongololwa oye Nestor Usebui ha longele poshitaashi shopolifi poWanaheda.
Omufekelwa naye vati oku li ha longele poshitaashi shopolifi poWanaheda.
Omupopiliko wopolifi moshitukulwa shaKhomas Warrant Silas Shipandeni okwa hokolola ta ti ovapolifi ovo okwa li tava nu pondingosho nokonima ova ka tameka tava tanguna.
Vati omufekelwa weedula 28 okwa kufa ondjebo yaye yoilonga ndele ta yashe Usebui momutwe loikando ivali ndele ta xulifile ponhele opo.
Opolifi oya hokolola tai ti eshi ovanailonga wouhaku va ka fika ponhele opo ova hanga nale nakuninga oshihakanwa a xulifa nokonima olutu laye ola twalwa kokila.
Ovakwapata vaye ova shivifilwa kombinga yefyo laye nomakonakono opolifi otaa twikile.
Omufekelwa okwa kwatwa po efiku olo a longa oshimbuluma nota holoka momhangu yaKatutura Omaandaxa.
Shipandeni okwa kunghilila ovapolifi opo va xulife po okukala tava tanguna peendingosho shaashi eshi itashi ulike efano liwa moshiwana.
“Oshififa ohoni ngeenge ovapolifi vakwetu tave lidipaa neendjebo doilonga komesho yovakwashiwana. Ovapolifi nava kale tava kundafana nombili opo va kandule po omaupyakadi avo ngeenge ve li nine eenghone shaashi okudipaa kaku shi ekandulepo lomukundu,” Shipandeni ta ti.
Okwa weda po ta ti ovapolifi nava xulife po okukala tava i neendjebo doilonga keendingosho shaashi kape na omupolifi a pitikwa a twaalele oshilwifo ngeenge tava i keeningo.
fhamalwa@nepc.com.na.