Victoria Kaapanda

Omunangeshefa gwiinima yopamuthigululwakalo Liina Niingo gwomolukunda Evuluko mOshakati okwa kumagidha ta ti, omuthigululwakalo nagu simanekwe. “Omuthigululwakalo ogwo omulilo gwoshilongo,” ta popi ngaaka. Niingo oha landithi iikulya yoludhi kehe, ngele tashiya kiikulya yOshiwambo. Ta ti, ongeshefa ye okwe yi tala ko yasimana oshoko oya yooloka koongeshefa odhindji tadhi ningwa kAanamibia aakwawo.

“Aashona yo mutse, hatu landitha iikulya yOshiwambo, yamwe otaa ti, oyasa ohoni oku landitha ekaka, nenge omakunde gondulu,” ta popi ngaaka. Ta popi ta ti, Aanamibia ngeno okwa li haya simaneke noku kaleka po omuthigilwakalo gwawo ngeno otaya niingi aayamba.

Oshoka kehe shimwe konyala, ohashi vulu oku etwa po oku pitila momuthigululwakalo, itaapu ka landwa yimwe yokondje yoshilongo. “Ndhika onde dhi popi oshoka ondi wete oshilongo shetu tashi tekauka po esiku nesiku, tse Aanamibia ohatu kwatwa ko noku fuuka kwaambi yokondje yoshilongo shetu, tse tatu ekelehi omuthigululwakalo gwetu, sho shoka tu li monkalo ombwiinayi yi li ngeyi nena,” Niingo ta fatulula ngaaka.

“Namibia omuyamba pamithigululwakalo, e na omaudhano gi ili nogi ili, iihongomwa yi ili noyi ili, omusika, omaimbilo, iikulya, omagumbo nomizalo ndhoka hadhi zalwa pamithigululwakalo dhi ili nodhi ili dhaNamibia.” Ta ti, omuthigululwakalo oshinima sha simana kOmunamibia kehe, tagu dhana onkandangala onene momulandu gwombepo yedhiminathanepo molwaashoka momuthigululwakalo omo moka Aanamibia taye ya pamwe nokutseyathana, taya igililathana noku ulikilathana kehe gumwe ongushu yomuthigululwakalo gwe.

“Natu kondjeleni omithigululwakalo dhoshilongo noshigwana opo ku andjakanekwe nawa iitalenti nomagano ogendji gopamuthigululwakalo ngoka ge li mAanamibia, ya ete po oongeshefa dhopamuthigululwakalo, dha ili no dhi ili. Ta ti, oshindji otashi vulu okuningwa okupitila miinima yomithigululwakalo, mbyoka tayi vulu wo oku kandulapo no kweetapo oompito dhiilonga.