Kakukutu komatanga opolifi Inspector General Joseph Shikongo okwa ti itashi kwafele sha okukala moshilongo mu na ovapolifi vahapu ashike ovo tava longo oimbuluma nombumbo.

Shikongo okwa ti oshi xwepo moshilongo mu kale ovapolifi va nini itava longo shi dulife eshi etanga lopolifi tali kala la idilila ovakoyolinyanga.

Ta ti oshafimana ngeenge moshilongo mu na ovapolifi tava longo payuuki nokulitula mo moilonga yavo.

Okwa ti ovapolifi otava longo oilonga tai fifa ohoni eshi hava kala tava kufa ombinga moimbuluma ya yooloka.

Okwa ti ombelewa yaye ita i popile ovanambelewa wopolifi tava kufa ombinga moimbuluma onghee ku keshe ou taka lopotwa ta longo nombumbo ota ka ninga oshihopaenenwa sha vakwao.

Edi Shikongo okwe dipopya Etine eshi a ninga eenghundafana naKundana pefimbo kwa li ta popi kombinga yoshikumungu shomunambelewa wopolifi ou a kwatwa po Etitatu eshi vati kwa li ta kendabala okutwalela omunadolongo oingangamwifi moWindhoek.

Omufekelwa vati okwa kwatwa nekutu leembapila mu na epangwe loCannabis opo a twalele omunadolongo e li mokakuma koKatutura.

Vati omufekelwa okwa futwa N$50-00 komunhu ou e mu tuma a twale epangwe meni lodolongo.

Omwedi wa djako omupolifi womulumenhu nomukainhu okwa li va kwatwa po eshi va longifa ombumbo va futwa oshimaliwa komukwashiwana opo ve mu ningile eembapila noipupulu kutya okwa li moshiponga shotuwa.

Omunambelewa wopolifi a longele kOmuthiya naye okwa li a kwatwa po eshi vati a vaka omahooli epangelo ndele ta tula omotuwa yaye yopaumwene a longifa okakalata koilonga.

Shikongo okwa ti ku keshe omunambelewa wopolifi ta ka longa oimbuluma ota ka kala a ka nifa oilonga ile a tulwe pedu manga pokafimbo.

“Ovapolifi nava kale tava yandje oshihopaenenwa shiwa moshiwana. Ovapolifi nava kale va fimaneka oilonga yavo nokukwashipaleka kutya otava a mene oshiwana nokutula po elandulafano,” Shikongo ta ti.

Okwa kunghilila oshiwana opo shi kale tashi lopota ngeenge sha mono omupolifi ta longifa ombumbo opo omupolifi oo a kale a kwatwa po diva.

“Otwa pumbwa moshilongo mu na ovapolifi ve na elandulafano moilonga yavo ndele hava polifi ve li ninga oikengelela tava tula ovanhu mokatoo,” Shikongo ta ti.

Okwa weda po ta ti ovapolifi nava xulife po okukala tava longifwa moinima ya nyika oumbudi shaashi eshi otashi eta va kanife oilonga yavo. fhmalwa@nepc.com.na