Rundu – Sipangero sosinene saRundu ngesi kuna kunana noudigu mokutulisapo ukanguki morwa udigu ou wokuninka asi tanko mema vana gapata morwa ndango zodoropa kapi zina kuyivhura asi mema gakare taga piti nkenye ezuva.
Vaveli ava vakara asi kugwana uhaku ntudi vahepa kugwana mema ngesi kuna vatamba nye udigu wangesi , unene wonongera ngesi kapi tavagwana uhaku morwa nomahina odo ava ruganesa dahepa kugwana mema vadizerese yipo dikare asi dina wapa ntani dina zere. Mukurona gosipangero koruha rouhaku ndokotora Joseph Mukerenge katanterere sayitunga za New Era asi udigu ou womema modoropa zaRundu kuna gumu egendeso noyirugana nayinye mosipangero. “
Ezero lyosipangero unene kuligwanena komema. Ewapayiko lyonondja dovaveli nado kudiruganesa komema, nampili kuzeresa nomahina nadinye odo muna ruganesa dahepa kudiruganesa komema, unene ose tuna kara ngesi novaveli wokuvera nongera, ava kara asi nkenye apa konomahina ano nomahina odo dahepa mema, nsene kwato mema vantu vangoso kapi tavagwana uhaku, makura ose kuna kutura nye eparu lyovantu owo moudigu, ngoso ose kuna kutura nye ukanguki wawo momukaro gwahana divilisa, yimo ngoso ana kuyididilika Mukerenge.
Moomu tupu gakara mavango nagenye, sipangero sepangero saRundu naso kugwana mema kondango zodoropa, nsene asi modoropa mwato mema hawe sipangero naso kwato mema, nampili ngomu yakara asi vakara nevango lyawo oku ava gwana mema, nsene asi ndama zondango zodoropa mwato mema nawo mosipangero tauvagumu udigu wangesi. Morwa evango eli ava gwana mema nalyo kugagwana kondama zonene zondango zodoropa zaRundu.
Kwahana mema, moomu tupu wayidiva asi nampili vakare vaveli nawo vana pumbwa kuruganesa yikasayise ntani mavango ogo gana pumbwa kugazeresa, awe ngesi kuna kara moukangu woudona. Mukisi ngesi kuvhura kugugwana noureru morwa kapi yina kumoneka nawa mosipangero sosinene. Moomu tupu yina kuhoroka momaruha nagenye godoropa, sipangero naso kukara sahana mema makura kuninkisa nye tupire kusikisamo yirugana yetu, nye ose kwalituramo asi nkenye apa twahepa kufuta mukuli gwetu kondango zodoropa nosiruwo.
Yimo ngoso ana kufaturura ndokotora Mukerenge.
Sipangero simpe kavageve masivano asi yihado yawo kapi ava yidamunapo nosiruwo wondango zodoropa, eyi nayo yina kara asi ukanguki kwato mosipangero, yihando vahepa kukayizuguma nkenye siruwo ndi asi mosivike rumwe hansa.