Omuthiya – Vanyime vavali ava vana kureta udigu kavavaroyere vanafarama ntani varugani woMinisteli zekungo nsitwe momukunda Oshikoto konyima tupu varulya nyama owo vadipaga nongombe poOshivelo mouyivike eyi yina pitipo. Vanyime ava kwavarapota asi kwadipaga nongombe ntazimwe, nkambe ntani yikombo yine pomukunda gwaOshivelo. ‘’ vanyime ava kavavaroyere varugani vetu moutatu masiku, morwa awo kwavatura asi kuna kureta udigu unene awo hena kwahendauka mevango eli ava vatakamesere nampili ngomu yakara asi awo nkenye apa kuyavapapara nepu vana hene ‘’, yimo ana kutanta muhuyungi goministeli ozo zekungo nsitwe Romeo Muyunda.
Etokoro kwalitulisapo asi vahepa tupu nye kuvaroya nokuvadipaga vanyime owo vavali yipo asi twahaka zumbanesa hena yikorama yimwe morwa vanyime ava. ‘’ Awo kuna kara tupu asi vanyime wougara unene,makura etokoro yiyo tupu lyakere asi twahepa kuvagusapo morwa udigu ou nare nye una gusa. Yimo ana kugwedako ngoso.
Mokugwedako, Muyunda, katente asi vanafarama navavapa mbatero omu navaturamo mahundiro vavafute morwa kuzumbanesa yimuna yawo kukwama nye elikwamo eli lyakarapo nomutangu vantu noyikorama vatulisapo. Veta kwakara asi yimaliwa yokusika ko N$100 000 kuyigava vakalivatereseko vekoro nsene sikasama sinamudipaga, ano owo nye nsene kuna muremeke sikasama kugwana N$50 000 ano nsene asi ruha rumwe rorutu runa remana kugwana nye N$30 000. Ano nsene kuna zumabanesa ngombe, muna farama gahepa kugwana N$3 000, N$800 nkambe ntani N$700 sikapa ano sikombo aso kumupa nye munafarama ogo, N$500. Foromani gomukunda Oshivelo Erwin Nashikaku katente asi yitundwamo kwayigwana sivike sina puko omu asi vanyime kuna kusana momukunda, omu nye vatungimo vavapa mbudi ezi kumwe nokuvatantera asi yinke navarugana.
‘’Ame kuvhura kuyonkondopeka asi vanyime kavavaroyere pofarama zimwe zakara poOshivelo, ano apa nye kavayirugene ngoso mokukeverera yimuna yawo oyo kavadipagere yipo nye kani vatanterere vayitware kwaHompa gwetu govandonga kukwama ngendeseso zetu. Eyi katuyirugene, makura nyama ezi yipo nye kavazigeve kovanamberewa owo woyimuna ‘’, yimo ngoso ana kutanta pausupi Nashikaku. –osimasiku@nepc.com.na