ONGWEDIVA – Ovanafikola ve dulife po1 000 ova mana omalihongo avo neudo koshiputudilo shoNAMCOL konima eshi va djala omanguwo.
Oshivike sha dja ko ovanafikola 95 mendiki loNAMCOL laNgwediva ova djala omanguwo momaifano a yooloka.
NAMCOL oshiputudilo hashi yandje eetundi momaifano eenghatu da yooloka noshoyo eetundi kovanafikola va dopa ondodo onhi-11 no12 opo va dule okuxwexwepaleka oilongwa yavo.
Moshipopiwa yaye omukulunhuwiliki woNAMCOL Heroldt Murangi okwa ti Namcol keshi ashike oshiputudilo shovanhu va dopa ondodo 12 ashike oshiputudilo shi na omaifano a yooloka mwa kwatelwa omaifano opoungoba.
Murangi okwa ti Namcol ota twikile nokuyandja ehongo longushu noshoyo oikwafifo ya wana kovanafikola opo va dule okupita nawa.
“Otuna ovanafikola vahapu tava longo va pita moshiputudilo shoNAMCOL noshoyo ovanafikola vamwe tave hongele koiputudilo ya yooloka va dja moNAMCOL,” ta ti.
Okwa ti okudja momudo 1997 NAMCOL okwa dana onghandangala ya kula mokuyandja eemhito kovanafikola va dopa ondodo 10 nondodo 12 opo va xwexwepaleke oilongwa yavo.
“NAMCOL oshipupudilo sha fimana molwashi osha lundulula eenghalamwenyo dovanafikola vahapu unene tuu ovo va pita oilongwa yavo okupitila mopolongala yaNAMCOL,” ta ti.
Koshindingili shedjalo lomanguwo okwa li yoo vali kuna ngoloneya waShana Elia Irimari nokwapandula Namcol eshi ta twikile nokundja ehongo longushu kovanafikola unene tuu ovanyasha.
fhamalwa@nepc.com.na