Aron Mushaukwa
Marythar Kambinda
KATIMA MULILO – Sikolo sesinyani sa Izimwe mwasilalanda sa Kabbe yaMbowela mwasikiliti sa Zambezi, sitalimani ni butata bwa kutokwa makilasi ni miyaho yesupezi, ili taba yetaseza baituti ni maticele.
Muzamaisi wasikolo swalelele Michael Likando naize kusali kuyahelwa muyaho wañambekelo silimo sa 2009 hakuna muyaho obafumani.
“Nelufilwe feela matente kakuli babana nebalutelwa mwatasa likota. Natolokile kuli matente awanga nikufefulwa kimoya. Mubakweli wakatengo kasikolo Lunza Mwanamwali naize hakuna maofesi amaticele.
Naize bashemi nebayahile muyaho wamubu mi niona use usupezi, mi kanako ye yapula ukenisa mezi.
Mushemi yomuñwi Calivina Mulalelo niyena nabilaezi.
“Taba ye hakiyende, kubona bana baluna mwamayemo acwana, mandu aluna mane abutuka. Lukupa liluko la tuto kutusa bana baluna” nabulezi. Baituti nibona neba bilaezi.
Violet Simasiku yakena mwasitopa sa busilezi naize hakuna ni moya tente fokuñwi yabawela.
“Hainela libuka zaluna zakoloba. Luikutwa kukungulelwa kwatuko mi lukupa kuli muuso ueze sesiñwi,” nabulezi. “Hane nili mwasitopa sa bune macwe naluwela, mbundu niyona nelukulisa,” nekubulezi muituti wasitopa sa busupa Michael Sikopo.
Hane akupilwe kualabela falitaba zeo, muzamaisi watuto mwasikiliti sa Zambezi Josty Kawana naize hazibi butata bwasikolo sa Izimwe.
Kono naize hakomokwi kakuli sikiliti sitalimani ni butata bwakutokwa makilasi ni miyaho yesupezi.
“Mwa Katima kamutala, nelulumelelani kuyaha likolo zañambekelo zepeli. Liteñi, kana kikuli litatulula butata bwakutokwa sibaka? Batili. Miyaho yeñwi iyahilwe seli kale, mi sesupezi, sicaba nisona sahula. Kacwalo kutatulula butata bwakuli banana basike baina kwahae lubafa matente, halusalela kuyaha miyaho yañambekelo,” nekubulezi Kawana.
Naize bakaeza lipatisiso kubona likolo zesesupezi, kuli lilundululwe.
Kono naize buñata bwalikolo litokwa tundululo, kono kuitinga kwamasheleñi hafumaneha.