KATIMA MULILO – Lilalanda za Kabbe ya Mbowela ni Mutulo li amuhezi pula yende kuzwelela litabula halikala, kutisa ze nde ni butata kanako yeswana mwa sikiliti. Hane abulela ni New Era kansela wa silalanda sa Kabbe ya Mbowela John Likando nafitisize manzwi ahae anyakalalo hala pula. Nabulezi cwalo hala butata bobutaha bakeñisa mikwakwa yesika bakanywa hande mwa sikiliti.

“Seni kona feela kubulela kisa kuli pula ki yende kwa balimi mi kiye maswe kwa bakwaezi ba limotikala, sihulu ba ba isa lisebelezo za sicaba. Silalanda sisa sialezi hala zwelopili sihulu mukwakwa ongungahanya likolo, lipatelanayana ni liofesi zeñwi za mubuso,” nabulezi.

Naize pula kamita itibisanga silalanda sa hae. Kono naize taba yende kikuli pula itisa lico bukaufi ni sicaba. “Muunda wa mwaha utisa litapi ni miloho, mi mafulelo alikomu ni ona aba hande hahulu. Licalano lifumana mezi aswanela ni moya kuli lihule hande,” nabulezi. Kono naize muunda oswana utisa butata.

“Mikwakwa iba yemaswe kwa bakwaezi bakeñisa mubu mo inezi. Kunanuha kwa mezi kusuluhela mwa milapo, kupuma mikwakwa, kutahisa kuli misipili yakuya teñi itatafale,” nekutolokile Likando. Zeo ni halili cwalo balimi base baikola kunela kwa pula. “Kwa saana lukala kucala lipeu mwa Muimunene. Halubulela, lise libuzwa, mi cwanuñu lika kutulwa, sihulu mbonyi,” natalusize.

Hala kuitukiseza nako ya muunda, Likando naize misipili ya mwa mezi ibonwa ki katengo kasikiliti sa Zambezi, ili kona kaka alabela kwa linako za putako. Kansela nasepisize sicaba kuli milelo ilelilwe kubona kuli batu haba tasezwi ki muunda. Kansela wa silalanda sa Kabbe ya Mutulo Bernhard Sisamu nasusuelize balimi kuzwelapili kulima masimu.

“Luzwa mwanako ya linanga. Buñata bwa balimi basweli kulima masimu abona, kono babañwi basali mwa mulaho, mi Habana kulima. Babañwi babulela kuli likomu zabona liotile halikoni kulima,” nabulezi. Nabulezi hala butokwa bwa kutokomela kucinca kwa mayemo alihalimu, mi naize munelelo wa pula ucincize mwa lilimo zefitile.

“Bakeñisa kucinca kwa mayemo alihalimu, pula se inela mwa Sope isiñwi mwa Njimwana mone luzibela. Kacwalo balimi baswanela kulima ni kutusa mubuso kubona kuli kuna ni lico zeñata,” na elelize.