ONGWEDIVA – Kakukutu komatanga opolifi yaNamibia Inspector General Joseph Shikongo okwa pula eendalaiva di na eebeta opo di fute outiketa vomopate pefimbo opo ku kelelwe odolongo.
Edi Shikongo okwe di popya e likwetelela komivalu dovanhu 1332 tava kongwa keinda lopolifi kOshivelo molwashi ve na outiketa vomopate ina futwa. Okwa weda po ta ti pefimbo e li lomwedi womatango manene ovanhu nava fute outiketa wavo opo vaha kwatwe po. “Osha fimana ngeenge omunhu e li pamwe novapambele vaye pefimbo pomatango manene. Itashi ulike efano liwa ngeenge omunhu e li modolongo omanga ofamili yaye i li keumbo tai tyapula edalo lomukulili,” Shikongo ta ti.
Ovanambelewa vopolifi keinda kOshivelo ove li pyakidila nokukonga omadina ovanhu ovo va dopa okufuta outiketa vavo molwashi paife omafiku okufuta oo kwa li atulwa po okwa pitilila. Kakukutu kopolifi okwa popya ta ti okwa ya kula omikanda dihapu okudja moshiwana tashi pula opo a wedele omafiku okufuta outiketa neemwedi mbali komesho.
“Ame kandi na oufemba wokutokola opo omafiku a wedelwe. Ondi na tete okukala omutumba novambelewa okudja koshikondo sheendjila noshoyo komhangu opo tu kundafane oshikumungu eshi,” ta ti.
Okwa ti ovanhu nava longife omukalo muwa wokukala tava i komhangu ngeenge va pewa outiketa opo va ka kundafane kutya ota mono naini oshimaliwa a fute. “Okukongwa kopolifi ka shi wa molwashi otashi eta omunhu a kwatwe po. Omunhu ngeenge e na omafiku aye okufuta okatiketa e li popepi nokukusha okwa manguluka oku ya komhangu ndele tava i meenghundafana,” ta ti.
Okwa weda po ta ti omunhu ngeenge okwa ka nifa ombapila oyo hai shangwa omafiku okatiketa kutya ota kushu naini na kale tai komhangu opo ka pule ouyelele kutya omafiku okatiketa aye otaa kushu naini. Shikongo okwa kumaida ovapolifi opo va longe pauyuuki ngeenge tava yandje outiketa pehe na ovanhu tava futu ombumbo.
“Omunhu na pewa ehandukilo lokufuta okatiketa she likwatelela kepuko olo a ninga ndele haku yandje okatiketa koshimaliwa shihapu shaashi omupolifi ve likwatela onghone na mwene wotuwa,” ta ti.
Okwa kumaida ovanhu opo shinge nawa noku li ufa komadidiliko omeendjila efimbo keshe. “Ovanhu inava shinga va kolwa shaashi otashi eta oiponga. Omunhu tete na konakone otuwa yaye ngeenge otai dulu okushingwa oshinano shile,” ta ti.
Okwa weda ta ti omwedi ou okwa lopotwa nale ovanhu va xulifa moiponga yeetuwa.