Auleria Wakudumo
Omulumenhu weedula 29, womomukunda Okaandje mOngwediva okwa yashwa okufya komulumenhu weedula 36 pefimbo vali tava tu eemhata.
Omupopiliko wopolifi moshitukulwa shaShana, Chief Inspector Thomas Aiyambo okwa holola ta ti oshiningwanima osha ningilwa molukanda laMandume, mOngwediva moshitukulwa shaShana, sha ningwa Etivali lwopo 23h30.
Aiyambo okwa ti vati omufekelwa okwa holola ta ti nakufya okwe mu kufila ombele ndele yee ta kufa mo odjebo oyo ihena oufemba (eembapila) nokumu yasha. Opo a xulifila opo.
Opolifi, oyati kaina ouyelele natango kutya oshike sha eta elipumomumwe lovalumenhu ava vavali.
Aiyambo okwa koleka yo kutya omufekelwa okwali omupolifi nale.
Umwe womwaava vali poshiningwanima okwa holola ta ti ovalumenhu vati ovali tava tanguna, tava nanafana kombinga yeengudu dopapolitika osho sha eta omufekelwa a kufe mo odjebo nokuyasha mukwao momutwe.
Oshiningwanima shikwao, omulumenhu weedula 38 ota kondjo nomwenyo moshipangelo shepangelo shaNandjokwe eshi a tuwa nombele yokappi komulumenhu weedula 24.
Oshiningwanima osha ningwa Olomakaya la djako nosheya ashike vati okulopotelwa opolifi mEtivali, sha ningilwa kolukanda Onuuholo mEheke.
Aiyambo oo a koleka oshiningwanima eshi, okwa holola ta ti nakuningwa oshihakanwa ovali tava lu ndele ta nipula mo ombele, ngeno ei twife omulumenhu oo a li ta lu naye.
Vati omulumenhu mukwao oo a li e li omutumba kokule navo okwa dja ko noku kendabala ngeno a kufe kumwe oonakulwa. Moipilikisha omo, naku hangununa okwa kufa ko ombele oyo noku i twifa mwene wayo.
Nakuningwa oshihakanwa vati okwa twalwa koshipangelo shepangelo shaNadjokwe oko ta mono epango lopaunamiti nokuli monghalo ii.