Taimi Haihambo

Opoloyeka yeexuxwa ya shivika nawa nedina Tshiyengeenge Tshakati Kamwe Chicken Farming momukunda Otsalindi moshikanjohogololo shaTamanzi moshitukulwa shaMusati osho ye ya omwenyo konima eshi ya li ya dengwa pedu koCovid 19, noya kala itai shi endifa nawa.

Opoloyeka yeexuxwa oya li ya shivika nawa ongaKamana kaNdongo ngeenge tashi ya pokulandifa eexuxwa osho yo omai moshitukulwa shaMusati.

Oya li ya nangekwa pambelwa mo 2017 okudilila mombelewa yangoloneya, noya li koshi yokambani yedina Namsov, ya li ya pewa ovanafaalama tava longo nounafaalama weexuxwa moshitukulwa.

Ovanafaalama ve li 22 ova li ve linekelelwa opolyeka ei, nokwa li va pewa ouxuxwena ve li 100 ovo va tameke navo ongomalolelo.

Sem Kandjimwena oku li umwe womavafindani vopoloyeka nokwa ti eshi va tameke aishe oya li tai ende nawa. Okwa li lela hava mono eexuxwa dihapu osho yo omai oo hava ka landifa meni loshitukulwa. 

“Eshi omukifi woCovid 19 wa ka tameka owe ke tu kwata moshipala. Oikulya yeexuxwa oya ka tameka lela ye tu pumba. Otwa kala hatu ke i landa kOshakati, ashike eshi omukufi wa ka eta oitukulwa i kale itai liende vali, katwa li tu na nghee hatu ka fika koshitukulwa shaShana tu ka konge oikulya yeexuxwa, fyee katwa li tu na lela oilya ya wana tu dule oku di palufa,” ta ti.

Ashike konima yoCovid 19, aishe oya tameka vali okweenda nawa. Ombelewa yeleleo lOmusati oya yandja eexuxwa dokunangela omai di li 170, nomefiku vati ovanafaalama ava ohava likola oipakte yakula yomai i li ine.

-taimihaihambo2000@gmail.com