OSHAKATIS – Kabinets di Sekretareb, George Simataab ge ge mî, ǂHanub xa a ǀhonkhoe-aihe ǂnûiǂgādi (SOEs) nî ǂhanub !ereamxasigu !nâ !oabade mā tsî !hū!nāsi omkhâisens ǁgūbade sī!nâs !oa ǂkhâ!nâsa. Simataab ge ǂoa ge wekheb di Wunstaxtsēs ai ge Oshakatis !nâ hâ i ǂnûs, ǂHanub a ǀhonkhoe-ai ǂnûiǂgādi di Dana Sîsenǂuira Mâisan ge ǂgaeǁaegao hâ is tawa nēsa gere mî.
Simataab ge nē ǁhao-aona ge mîba, SOEdi a ǂhanub ǂnûiǂgā !khaisa tsî di Namibiab di !nās !aroma ǂhanuba ǁîdi ai a ǀhonkhoese tsîs !ereams âde a !gāsa, ǂhanuba di nî !oabas disa !khaisa. Simataab ge ge mî, ǀgūǁaeb ge ǂhanuba hoa!nâ-aixase ge a !khō!oahe sîsenǀgaugu tsî dīǀgaugu ǂhanub ǂnûiǂgādi xa nî saohega a mâi-ai!âsa.
Nēpa i ge ǂhanusi !nāmab, ǁkhawa kō!gâhe tsî ge ǀkharaǀkhara!nâhe daoǁgaugu tsî mîǁguisa xoaǁguigu tsî ǁgaraga a !khōǂgāsa. “Nēn hoan ge a ǂgâxa-ūbahe !khais ge, ǂhanub ǂnûiǂgāde nî ǀkharaǀkharase isa îdi ǂâuǀoasasib !nâ ǀgau ra !oabamaose ī, !hū!nāsi omkhâisens ǀaweǁguigu(NDPs) hîa Mûǂuib 2030 diba sī!nâs !aroma kaise a ǂhâǂhâsade,” tib ge ge mî. ǁÎb ge ai!â ge mî, ǂhanub ra ǁîb di ǀaweǁguiga sîsenxa kais di ǁôab hîa ǂhanub sîsenaon ti a ǂansab !nâ-ū, ǀnî khami ī !oabade nē !hūb di ǁanǂgāsabena mās !ereamsa tani hâ !khaisa.
ǁNā !oabadi !khōǂgā hân ge, xawe ǁîn guin ose, ǁgau!nâs, enerxib, ǂurusib, ǀhûhâsib !norasasib, !nari!oabadi, ǁgam-i, ǀhûhâsiba kō!gâs tsî ommās tsîna kai ǀnōb ai. Nēs ǂnamipeb ge ǂhanuba ǁîb a ǀhonkhoe-ai ǂnûiǂgāde nē !ereamdi ǀnîde nî ǁîb ǀons !nâ sîsenǂuise īs di !ereamsa ra mā.
Sîsengu di !ereamdi ǀguidi oseb ge ǂhanuba ǁîb di ǂnûiǂgāde sao ra !ereamdi !aromas tsîna ra ǂnuwi, ǂgaiǀons aisîsenga ǂnuwis, xūn ǂganǀgauga tanihe ǁkhā ǀgaugu !nâ ūhâǀgaras, aitsama mâbasensa kurus tsî !hūb di khoen ǁkhoregu !nâ dīǀoaǀoas. ǁ
Nā-amagas, ge ǂhanub ǂnûiǂgādi !nā!nui-i ai ǀguri mâ khami nî sîsen !khaisa ǀguis khami ī !gâi-i tsîna !khōǂgā tama hâ. -Nampa
ǁGui-ais …
Kabinets Sekretareb,
George Simataab ge ge mî,
ǂHanub xa a ǀhonkhoe-aihe
ǂnûiǂgādi a ǂhanub di tsî ǁnā-amaga ǂhanuba hoa !harigu !nâ nî ǂnûǁkhaeba !khaisa.