Charles Ndeumane
ONGWEDIVA – Nonande ye mwene omvalele yaNamibia nokwa hokana omukulukadhi Omunamibia, omusamane gwomimvo 83 okwa hulile muunyengwi konima yomimvo dhi vulithe 20 sho a kala ta kambadhala okumona uukwashigwana nuuthemba wulwe woshilongo.
Oonkambadhala dhomunamimvo 83 omukalimo gwomomukunda Oshaandja moshitopolwa shaShana Fillemon Johannes dhokumona uuthemba wopashigwana waNamibia odha hulile muunyengwi konima sho anuwa a kala nokutumwa koombelewa dha yooloka dhuuministeli wiipambele yomagumbo negameno. Johannes ota ti onkalo ndjoka otayi mu hepeke unene nofamili ye, ngaashi omahogololo ga thika oku na ehalo lyokuhogolola ashike ita vulu nokupewa okakalata kokuhogolola.
“Onda valelwa momukunda Ouhongo moshitopolwa shaHangwena momumvo 1941 ashike inandi mona natango uuthemba.
Nale kasha li uupyakadhi uunene oshoka opwa li yakwetu yamwe kaaya li ye na uuthemba ashike oye ke wu mona ngaa konima yethimbo. Onda kala nokukambadhala ndi mone uuthemba oomvula dhi vule 20 ashike kehe ethimbo tandi yi kombelewa yuuministeli wiipambele yomagumbo negameno kOshakati ohandi lombwelwa ashike ndi tegelele manga aanambelewa taya kwashilipaleke omauyelele gandje nenge ya tumine ndje kombelewa yuuministeli mboka kEenhana molwaashoka onda valelwa moshitopolwa shaHangwena,” Johannes a ti.
Konima sho a hokana omukulukadhi gwe Elina Amon momumvo 2017, Fillemon okwa li e na einekelo kutya otashi kala oshipu okumona uuthemba, ashike sigo onena inashi kwatha sha. Omukulukadhi gwe okwa ti onkalo ndjoka oye ya guma nayi unene tuu pamahupilo. “Kandi shi kutya omolwashike itaa pewa uuthemba konima yoonkambadhala adhihe ndhoka twa ningi.
Okwa kala moNamibia onkalamwenyo ye ayihe, oye gumwe gwomaantu mbo ya tunga oshipangelo shaShakati, nayakwawo oyendji oya monene uuthemba sho uuministeli wiipambele yomagumbo kwa li wu na oshikonga shokugandja uuthemba momikunda ashike ye okwa thigwa ko ashike anuwa omauyelele ge inaga monika,” osho Amon a popi sho a li moonkundathana naKundana.
Omunambelewa omukuluntu gwomauyelele goshigwana muuministeli wiipambele yomagumbo negameno Margaret Kalo okwa ti ohashi vulika aakulupe yamwe ya kanithe omauthemba gawo ndele taya dhimbwa thilu kutya oya li ye na omauthemba molwuukulupe. “Uuministeli otawu londodha aantu ayehe mboka taya mono uunona kaaya ze miipangelo inaaya ningila uunona wawo oonzapo dhomavalo opo ku kandulwe po omukundu gwaantu taya kulupa kaaye na uuthemba.
Omukulupe ngoka okwa gwana okukala ta mono openzela yuukulupe oshowo yuulema ashike ngashiingeyi ihe yi mono oshoka ke na uuthemba,” osho Kalo a popi.
Amon okwa ti megumbo oye li mo 13 ashike kamu na nande gumwe ha longo nenge e na iiyemo onkene ofamili oyi inekela mopenzela ye okumona iipalutha.
Kansela gwoshikandjohogololo shaShakati shokUuninginino Aram Martin okwa ekelehi omapopyo gofamili yaJohannes kutya ohapu piti oomwedhi inaaya pewa iikulya yoshikukuta, anuwa aanambelewa yokombelewa yakansela oya ti omolwaashoka oye li mo oyendji unene megumbo nokushangwa ayehe ya kale taya pewa iikulya yoshikukuta. “Ohatu kambadhala aluhe okukwashilipaleka omagumbo ngoka gu udha oga pewa iikulya yoshikukuta,” Martin a ti.
“Andola otashi kala oshiwanawa tate e na uuthemba oshoka andola oha mono nopenzela opo tu kwathelathane moompumbwe dhegumbo,” osho Amon a gwedha ko.
-mrndeumaneraycharles@gmail.com