ONGWEDIVA – Loide Erastus weedula 23 noku li he lihongele ouhongifikola okwa ti okuudite etumba eshi ta longifa oshitalendi shaye okushika eengalo da yooloka shaashi okwa kala e na ohokwe  yokwiimba okudja kounona. 

Okwa ti okwa tameka okwiimba eengalo omudo 2019 pefimbo olo kwa li e li mondodo onhi-12.

Omukainhu ou e li omukalimo womOshakati okwa ti okwa shivika nawa nedina onga Nevermind Shiwalazo.

Okwe lihongela ouhongifikola koshiputudilo sho-IUM mOngwediva ashike okwe lipyakidila nokukonga oilonga.

“Onda djala enguwo neudo. Kakwa li shipu okuya kofikola ame handi ka shika eengalo pefimbo limwe,” ta ti.

Okwa ti oha shiki eengalo domaludi a yooloka noha ka imba koivilo ya yooloka ngeenge a ufanwa.

“Ohandi dulu okwiimba meehango, keefikola ile koitufi yomaulikilo oipindi,” ta ti.

Okwa li ina hala okukala a mwena ita longifa oshitalendi shaye.

“Paife ohandi mono oyuuyemo ngeenge handi ka shika eengalo molwaashi ovanhu ohava futu,” ta ti.

Okwa ti oshimaliwa osho hava futwa okupitila meengalo ohe shi longifa okufuta olefa ngeenge ta i komapulapulo oilonga.

Erastus okwa yelifa ta ti ovashikingalo vashona moNamibia ova taalela omashongo okukala ihava ufanwa va ka imbe koivilo ya kula.

“Keshe omudo ovanhu ashike vamwe hava di mo va ka imbe eengalo koivilo yonhumba ashike hafye hatu dimo. Onghee eshi itashi yambula po ovashikingalo moshilongo,” ta ti.

Okwa kumaida ovanyasha vakwao opo va kale tava longifa ounongo wavo shaashi eshi otashi va etele oyuuyemo.

“Out na ovanyasha vahapu ve li momaumbo va mwena inava hala okulongifa ounongo wavo,” ta ti.

Okwa pula epangelo opo li kale tali yambidida ovashikingalo noshimaliwa molwaashi vahapu ova taalela omashongo oshimaliwa.

Ota monika kepandja laye koFacebookk nedina Loide Shiwa. –fhamalwa@nepc.com.na