Auleria Wakudumo
Omukainhu womolukanda Oshoopala mOshakati okwa hokolola ta ti okwa kanifa ombili novashiinda shaye nokwa loloka okutukwa nokuningilwa omatilifo edipao sha dja eshi vati a lundila ovashiinda shaye kutya otava li okaana kaye eshi ta ti ka dalelwe a makuke.
Lina Josoni okwa ti ovashiinda shaye ove mu tulila mo vati oshibofa shoulodi kukapatashu wolukanda lavo. Ovashiinda ova li vati va kalekwa omutumba ashike natango omatukano nomatiliko onghene ngaho a lundalala.
“Kanda li ndi shi kutya ovashiinda shange ove na oudjuu naame fiyo osheshi kapatashu a ifana nge meumbo vati tu ke linyike komilungu molwoshibofa osho va tulilange mo. Onda li nda kumwa neenghono mokuuda oshinima sha tya ngaha” Jasoni ta ti.
Meenghundafana naKundana, Jasoni okwa holola ta ti vati outondwe owa hovela eshi mushiinda shaye a kanwa namukwao molukanda oo e mu lombwela kutya vati kutya okwa ti otava li okaana kaye pamwe novashiinda vaheyali va wedwa ko.
“Momutumba, kape na ou a holola kutya aame nde mu lombwela shaashi aveshe vati ova lombwelwa ashike kuvakwao naau taku fekelwa okwa tembuka po nale ponhele opo,” Jason ta ti.
Jason okwa ti okwa hala ashike va xulife po okumu ningila omatilifo ngaashi ngaho okutya ota dulu okukanifa omwenyo waye nomatukano a kenyaneka.
Omushiinda shaye, Ester Haimbodi okwa holola ta ti pokati keebashu davo ope na eendjovo dihapu nonghela vati ova uhala tave lipe mo.
Haimbodi okwa ti oulodi naye vati okwe wu uda ashike.
“Okaana kameme oo oka kufila ounona vetu omundilo onghela ka hala okuxwika po eebashu detu. Eshi andi hokolola oshinima osho Jasoni okwa hala okutukange,” Haimbodi ta ti.
Omupedu wamwene womukunda molukanda Oshoopala, Thomas Nakambonde okwa ti eshi a li a ifana ovashiinda va kale omutumba ova djapo veli nipila eenyala.
Oilonga yange okukendabala okueta ombili pokati kovanhu molukanda ashike ava ova nyengwa okulipa ombili,” Nakambonde ta ti.
Nakambonde okwa ti shaashi ova nyengwa okutwa kumwa, okwa yandja ombaapila ya uka kumwene womukunda kEmbadu.