“Otandi vulu okukutha po oshikatha ngele ya mana ndi ka teleke omwiha?”
Osho gumwe gwomaakiintu mboka haya uhala ya kalela ehala mpoka hapu dhipagelwa nokuthigwa iiyekelwahi tayi zi koonyama dhiikombo a pula omulandi gumwe gwoshikombo.
Nguka ogumwe gwomaakiintu yaali kwa li taya hakana iipa yiikombo ya thigwa po kaalandi yiikombo, Olyomakaya ga zi ko.
Okukalela oshidhipagelo shiikombo koshana shomOshakati kashi shi oshinima oshipe kaanamagumbo mbaka.
Ohaya menekele pehala hali landithwa iikombo mOshakati lyi li molukanda Ompumbu, okuya kondjila yOshikuku.
Martha Shapumba gwomimvo 32, ngoka kwa li ta gongele iipa yiikombo omanga e na omwana gwoomwedhi heyali mondhikwa okwa ti, oha hupile mokugongela iipa nomandjandja ngoka haga ekelwahi.
“Onkalo kayi shi ompu ashike kandi na nkene oshoka otandi kongo uuhupilo, ngele onda kala nda mwena otandi si ondjala,” ta popi ngaaka.
Shapumba ta ti esiku limwe ohali piti ko lya lula, ngele owa adha yamwe inaaya lala po otaya ti otaya yi niipa yiikombo yawo, anuwa otaya ka ninga iikatha.
Ta ti, omanga taya dhiladhila iikatha yo oya hala oku ka lya.
“Nonando ongaaka ohaku zi aanamutimahenda ya fa ongweye ya tuminwa kuKalunga, ngele ya mono to kutha po iipa mbyoka yo otaye tu gwedhele po shomboloto,” ta hokolola ngaaka.
Ta ti, esiku otali piti ashike uuna wa makela sha, nuuna pe na ngoka e ya pa po omutse gwoshikombo nomakondo, ohaya ningi elago taya ka teleka ya landithe ya vule okulanda okakutu kuusila.
Omukulukadhi gomukwakuluntu, Saima Shilongo ngoka ina adha momimvo dhopenzela natango okwa ti, ndjoka oyo onkalo haya hupu nayo kehe siku.
“Kandi na omukwathi, omimvo dhandje inadhi adha okumona oshikwiila shepangelo onkene ohandi menekele mpaka opo ndi mone po sha opo ndi ka paluthe aatekulu yandje.
Shilongo okwa ti, ngeno okwa li ta mono oshimaliwa shokulanda uusila wuukuki ngeno ota vulu okulanditha.
Ta ti oha kambadhala ngaa okukonga iilonga yokoonyala nenge yomomagumbo ihe natango iha mono.
Sapalo Johannes ngoka ta landitha iikombo pOmpumbu okwa ti, aakulukadhi mboka ohaya kwata ondjuhwa komulungu, ta ti, sho taya ka tala iikombo koshigunda yo opo ye li nale.
“Ohatu ya pe ngaa iilonga ngaashi yokuyoga omandjandja nomatangala yo taya mono okamaliwa hoka taya vulu okupewa okuza N$10,’’ ta popi ngaaka.
Ta ti, shoka haya mono osho ngaa shoka.
-vkaapanda@nepc.com.na