Ehangano tali ithanwa Pewa Care Humanitarian (PCH) olye ya po noprogalama yokuyambidhidha aanona yosikola aakiintu ye li 5 000 nuukwathithi waakiintu pethimbo lyopaasa nuumvo.
Oprogalama ndjoka oya etwa po komukiintu omugundjuka gwedhina Ndapewa Ndongo ngoka oye mwene gwehangano lyo-PCH, e na elalakano lyokuyambidhidha okanona okakiintu.
“Onda tameke noprogalama ndjika momumvo 2019, ashike onda kala ndi na edhiladhilo lyokuyambidhidha okanona kokakiintu omanga ndi li mondondo ontiheyali,” ta popi ngaaka.
Ndongo okwa ti, okwa putukile kuushayi, hoka olundji aakiintu ya kala nokulongitha iifokundaneki osho wo iilapi onguukwathithi wawo oshoka kaye na sha, shoka sha kala noku mu uvitha nayi.
Ta ti, onkalo ndjoka oye mu pe edhiladhilo lyokuya po noprogalama ndjika oshoka oku uvite kutya natango ope na mboka yaa na sha ihe natango otaya longitha omukalo ngoka.
“Onda kala noku yambidhidha oosikola dha yooloka koWindhoek nuukwathithi, ihe onda ndhindhilike kutya natango konooli nako okwa pumbwa omakwatho getu,” ta popi ngaaka.
Ta ti, ehangano lyo-PCH olya manga uukuni kumwe nomupangi ngoka a shuwikila okuxwaxwameka uundjolowele opo ya tule opologalama ndjoka miilonga.
Ndongo okwa ti, oprogalama ndjika ya nuninwa opaasa, oya ningi nale omayindilo koosikola ndhoka dhi li unene mompumbe konooli.
Ta gwedha po kutya otaya indile wo kehe ngoka ta vulu okuyambidhidha a ninge ekwatathano nayo.
“Otatu indile oshigwana shi tu yambidhidhe opo tu vule okukwathela okanona kokakadhona pamukalo ngoka otatu lundulula oonkalamwenyo dhaanona oyendji noku ya kaleka moosikola,” ta indile ngaaka.
Ta popi kutya ota ka pandula kehe ngoka ta ka yambidhidha.
Ta ti kuuyelele wa gwedha po ya landula koInstagram @Pewa_Care_Humanitarian, email pch.nonprofit@gmail.com, nenge dhenga konomola +264 814965590.