Auleria Wakudumo
Omupresidente Netumbo Nandi-Ndaitwah okwa indila ekwafo koshiwana opo shiyambidide mokutunga nokuyambula po ongeleka yaNamutai St. Cuthebert moshitukulwa shaNgwediva.
Nandi-Ndaitwah okwa holola kutya ovakwaneongalo ova kala tava kendabala okuyambula po ongeleka oule wefimbo ashike inave shi pondola.
“Ohandi indile tu yandje ekwafo keshe opo tu dule okutwikila osho ovakulunhu vetu va tameka. Ovakulunhu ngaashi otatekulu Paulus Nanhuluka natatekulu Petrus ya Nghandi ovo va hovela oshilonga eshi shetumo, onghene natu twikile neenghono davo,” Omupresidente ta ti.
Omupresidente okwa holola yo kutya omaano ihama dinwa, osho shah ala okutya keshe osho ovakwashiwana tava ka yandja kongeleka otashi ka tambulwa ko nomutima wa yela okukwafela okuyambula po ongeleka.
“Moshiwambo omuna oshipopiwamayele hashi ti okuyandja okudulika. Umwe okwa tile shekupe pamba shambekela nomaoko aeshe,” Nandi-Ndaitwah ta twikile.
Nandi-Ndaitwah okwa ti okwa pewa oshinakuwanifwa shokukwafela nokukwatela komesho pamhepo ovakwashiwana vomomukunda waMakolombongo kuxe woamhepo.
Molwa oshinakuwanifwa osho, Omupresidente okwa ti okwa ninga oshilyo shongeleka oyo oshoyo oshilyo shomudingonoko oo tuu oo.
“Ohai yandje olupandu kumeekulu Anna oshoyo ovamwamemekadona vavali Lucia naInge eshi va dimbulukifange oshinakuwanifwa osho ndeli inekelelwa kutate kutya olupale lomumwa kalili monghalo ili nawa,” Nandi-Ndaitwah ta holola.
Omjupresidente okwa indila ovo vena oshinawanifwa shokuongela keshe osho sha yandjwa medina lokuyambule po ongeleka opo va kwashilipaleke kutya keshe osho sha yandjwa, shinini ile sha kula osha longifwa pauyuuki ngaashi sha nhuninwa.
“Ohandi indile yo ava vati kutya otava yandje omakwafo opo va wanife po oshilonga shavo. Opena eemhito dimwe oohandimwe hava popi ashike okufuula ovanhu,” Nandi-Ndaitwah ta ti.
Nandi-Ndaitwah okwa yandja olupandu kovanangeshefa eshi tava twikile okukwafela eengeleka moshilongo. Okwa indila va twikile oshilonga sha fimana moshiwana.