Liseli Machili, musali walilimo zemashumi amabeli kazesupile, upila mwakomponi ya Choto mwasikiliti sa Zambezi ni bomahe ni bahabo ni mwanahae wa musizani. Musipili wahae wakutisiwa nokalile ni katengo ka DREAMS. Mwasilimo sa 2020, nakeni mwa katengo ka DREAMS katuso ya mubeleki yasebeza ni sicaba, ili ndambo ni yafetuhile kuba muluti wahae. Kakatengo ka DREAMS, nafumani lituto kuamana za silelezo ya HIV, silelezo kwa likomano mwahala baana ni basali, hamoho cwalo ni lituso za masheleñi, niza buikezezo.
Katuso ya Purojekiti Hope Namibia, aitenga mwa lituto zabuikezezo kwa sikolo sa Zambezi Vocational Training Centre. Kasamulaho alituto zeo, afumana kolo yakuituta musebezi kwa Zambezi Autoplus, teñi zibo yahae yayo yanduluka. “Kasamulaho akufumana lyano, nakala pisinisi yaka, yakubeta likwalo, lipula ni litafule, ili zeni lekisa kwa sicaba. Pisinisi yaka setisize kuli nikone kufumana masheleñi alikana N$30 000 kakweli, nikuleka likota za kubeta kuli nizwelepili ni pisinisi yaka. Kakusebelisa zibo ya masheleñi yene ni fumani kwa DREAMS, nakwalula pisinisi ya kaloba, kuhulisa mayemo aka akukona kufepa lubasi lwaka,” nabulezi.
Kakuitumela kwatuso yana fumani naize katengo ka DREAMS neka mukwalulezi nzila yaku eza hande. Zeñwi zana konile kueza kikulekela mahe mubu wamaino teñi sa sweli kuyaha ndu, mi ulela kuñolisa pisinisi yahae. Nasusuelize babanca babañwi sihulu basizana kuiñolisa mwa tutengo totuswana inge AGYW. Nakupile hape Purojekiti Hope kuzwelapili kutusa likalibe mwanaha Namibia.
Naitumezi hahulu kwakamaiso ya Purojekiti Hope Namibia mwa Katima Mulilo, mi naize tuso ya PEPAFAR kakatengo ka USAID, nekonisize musipili wahae. “Kitaba yecincize bupilo bwaka. Senikona kuikezeza lika. Nitumela kwa katengo ka DREAMS, kakuli musipili nesi obunolo, kona neka ubisize bunolo. Haiba ubata kueza sesiñwi, ueze cwalo. Usike wazwafa – mi uitekele kolo yenca, nikuituta lika zeñata zazi ni zazi. Kamukwa ocwalo, ukona kueza hande,” nabulezi.