Auleria Wakudumo
Okakomisi komahoololo kedina Electoral Commission of Namibia (ECN) oka yandja oteendela yokunduluka eembapila dokuhoolola omahoololo omalelo opaitukulwa osho yo ookansela omudo 2025 kehangano laSouth Africa hali ifanwa oUniprint Global.
She likolelela komushangwa wa pitifwa kokakomisi komahoololo, eyandjo lotendela ei ola landula omulandu wopauyuuki hau ifanwa Open International Bidding (OIB), wa tameka mo 16 Juni neudo fiyo omo 28 Juli 2025.
Okakomisi komahoololo oka koleka kutya omahangano omoshilongo aheyali nomahangano atano okondje yoshilongo okwa li a landa eembapila dokuninga omaindilo. Eshi omaindilo e lipokuxula, otwa mona ashike omahangano anhe okondje yoshilongo oo a eta oipumbiwa yayo aishe she likolelela koPublic Procurement Act No 15 yo 2015. Omahangano a ninga omaindilo ongaashi: E7 Group United Printing, Shave & Gibson, Ren-Form CC noUniprint Global.
oE7 Group United Printing oya li ya pula eemiliona N$8.4, United Printing okwa li a tula mo eindilo loshimaliwa shi fike peemiliona N$6, Ren-Form oya li li ya pula eemiliona N$6.5 omanga Uniprint Global a pula eemiliona N$4.8.
ECN okwa holola kutya okwa hoolola oUniprint Global shaashi oya pula oshimaliwa shi li pedu komahangano aeshe, oshimaliwa osho nokuli sha kwatela mo okututa eembapila okudja koSouth Africa fiyo omoNamibia.
Ehangano loUniprint Global oli na eembonge dakula moDurban noshitayi shimwe shi li moJohannesburg. Uniprint otaka nduluka eembaapila dokuhoolola di li 1 817 100 odo tadi ka longifwa momahoololo elelo lopashitukulwa osho yo eembaapila 912 700 tadi ka longifwa momahoololo oukansela.
ECN okwa holola kutya okwa pungula oshimaliwa sheembaapila dokuhoolola shi fike peemiliona N$8.9 eshi tashi holola kutya ehangano eli la pewa oteendela oli li koshi yoshimaliwa sha tulwa po ku-ECN.
ECN okwa holola yo kutya enduluko leembaapila edi ola teelelwa li kale la hovela okudja mo22 Kotoba fiyo omo 31 Novemba 2025. Eembapila oda teelelwa di kale da fika pokapale keedila koHosea Kutako mu 1 fiyo 2 Novemba 2025.
Ehoololo lehangano olo tali nduluka eembaapila dokuhoolola ola ningwa paushili nopauuyuki nopashili.
Odula ya dja ko, ECN okwa li a yandja oteendela yokunduluka eembapila domahoololo kehangano natango laSouth Africa hali ufanwa oRen-Form. Ehangano eli natango ola ninga eindilo ashike inali pewa omhito oyo luvali.
-wakudumoauleria@gmail.com