Paulina Ndalikokule
Omukuluntuwiliki muuministeli wuuhaku nonkalonawa Ben Nangombe okwa londodha oshigwana opo shi lopote iilonga yuulingilingi nakehe shoka tashi eta uulingilingi miipangelo yepangelo.
Nangombe okwa popi ndhoka momushangwa gwiikundaneki oshiwike sha zi ko, sha landula omayamukulo ga pewa ehangano lyoAfrobarometer kaakwashigwana Aanamibia pethimbo lyomapekapeko.
“Uuministeli otawu indile aakwashigwana ya yakele ko ombelewa yomukuluntuwiliki, ombelewa yomupopiliko guuministeli, oombelewa dhomayakulo goshigwana nenge oombelewa dhaakuluntu yiipangelo ngaashi dhaapangi, oomatorona noosupilitende, uuna ya mono uulingilingi tawu ningwa miipangelo,” Nangombe a takumagitha.
Shi ikwatelela komakonakono, oopelesenda 60 dhAanamibia mboka ya yile kiipangelo nokomandiki guundjolowele gepangelo oomwedhi 12 dha ka pita, oopelesenda 40 oya holola anuwa kutya ‘osha fa oshidhigu’ ‘noshidhigu lela’ okumona epango lyothaathaa, manga oopelesenda 15 ya yamukula kutya oya futile oombumbo opo ya pewe uuhaku miipangelo yepangelo.
Nangombe okwa tsu omukumo aakwashigwana ya lopote kehe oshiningwanima taya ka mona shuulingilingi kuuministeli, ta dhenge omuthindo kutya uuministeli itawu ka popila nando omikalo dhuulingilingi nenge uulingilingi tawu ningwa kaaniilonga.
“Uuministeli owe shi popi sha yela kutya ihatu popile uulingilingi nomikalo dhawo ngaashi okufuta oombumbo kaaniilonga,” Nangombe a ti ngaaka.
Sho a yamukula komayamukulo gomakonakono ngoka, Nangombe okwa dhenge omuthindo kutya uuministeli owa etwa po nonkambadhala kutya kape na aantu taya vulu okukala inaaya mona uuhaku shoka tashi vulu andola okweetela aanuumvu ya fute mo aaniilonga nenge okufuta oombumbo kaaniilonga.
“Omayakulo guundjolowele agehe haga gandjwa kuuministeli wuundjolowele nonkalonawa ogoshali, ohaga futwa ashike okashona koshihako koondola ne kuupangelo uushona kwaamboka taya vulu. Kape na ngoka ha shunithwa ko ngele ita vulu okufuta. Oshi li momulandu gwepangelo kutya aakulupe, aantu taya lumbu nuulema, osho wo oonakulwa aakulu kutya ihaya futu okumona omayakulo gopaundjolowele,” Nangombe ta yelitha.
Ta ti epangelo olya toto po oshiketha showina shokuyambidhidha Aanamibia mboka ye na uuvu wi ikalekelwa shoka tashi gandja ekwatho lyoshimaliwa kaakwashigwana mboka taya pumbwa omapango omadhigu nomatando gi ikalekelwa ngoka ihaga ningwa miipangelo yomoshilongo.
“Aaniilonga ayehe muuministeli otaya indilwa ya tse kumwe noompango dhomayakulo goshigwana noompango dhokupanga aavu opo yi idhimbulukithe nkene ye na okwiihumbata pamulandu nomikalo dhi li mondjila ethimbo alihe. Mwaayihe mbika aaniilonga naya tambule ko omapuko gawo, naya isimaneke, ya kale megameno yo ya gandje omayakulo nuuyuuki,” Nangombe a tsu omukumo ngaaka.
Omakonakono ngaka oga ningilwe pokati ko 14 Maalitsa na 2 Apilili nuumvo moka aantu ye thike po1 200 ya kutha ombinga.