OSHAKATI-Omupevi presidente gwoSwapo, Netumbo Nandi-Ndaitwah, okwa gandja ashike omwendhi mbali komeho opo omatale ngoka ga kankamekwa okulongwa, omolwa uulingilingi ga kale ga pwa.
Nandi-Ndaitwah okwa li a popi ngaaka esiku kwali ya hulitha iigongi yawo mOshana, mehuulilo shiwike.
“Okwali nda kwashilipaleke kutya, pehuulilo lyomumvo nguka, omatale geli 11 otaga kala ga pwa okulongwa, okuyambindhindha oshigwana moompito dha yooloka oshowo okugandja iilonga kaanyasha, iihe shoka okwali sha yiwa moshipala kwaamboka taya longitha uulingilingi,” ta nyenyeta ngaaka.
Ta ti, omatale geli gane go mwaa ngoka, oga ndhindhilikwa ga longwa nuulingilingi wa shiga ko, sho shoka iilonga mbyoka ya kankamekwa mangwa.
Ta ti, oshipotha shoka ngaahingeyi otashi konakonwa koAnti-Corruption Commission (ACC), no sha tegelelwa shi kale shapwa mefimbo efupi, oshoka omatale ngoka oga pumbwa okupwa, no ga pumbiwa.
“Ngoloneya! onda hala wu konge oohahende dhoka dha popyoka nawa, opo ndhi tale nkene yena oku endeleleka oshipotha shika. Omatale ngoka ga kale ga pwa muFebuluali gomumvo ta guya,” ta indile ngaaka.
Nandi-Ndaitwah natango okwali a lombwele uuminiseli woshimaliwa opo wu kale wa kwashipaleka kutya oshimaliwa shoku longa omatale ngoka osha pitithwa mbala.
Ta popi ta ti, omeya oga simana noga pumbiwa ethimbo kehe, sho shoka omatale ngoka gena oku longwa opo ku vule okupungulwa omeya no kulongithwa uuna omeya ga pumba.
“Omeya oga simana unene moshitopolwa shaShana oshoka otaga pumbiwa okulongithwa kaanafalama, yiimuna oshowo yuunamapya,” ta ti ngaaka.
Omupevi presidente okwali wo anyenyeta kutya uulingilingi otau shunitha oshilongo monima, noku teya elongelo kumwe oshowo ombili.
Ta ti, kehe gumwe na kale e li ompinge nuulingilingi, opo pwaa kale pena ngoka teu longitha, nonakuyiwa yi longekendhwe momukalo omwaanawa.
Sha ikolelela kiikundaneki ya yooloka, oomwendhi dha thika pu hetatu, dha piti, oombelewa oonene moshitopolwa shaShana okwali dha pewa oomilliona N$15 opo ku longwe omatale, miikandjohogololo ya yooloka.
vkaapanda@nepc.com.na