Uuministeli wOmindhingoloko nUutalelipo owa ti otawu ya po nomilandu dha kwata miiti, okunkondopaleka egameno lyiiyamakuti moshilongo.
Shika osha landula sho kwa itsuwa oompanda dhi li 20 ndhoka dha li dha itsuwa mEtosha dha dhipagwa meni lyiiwike iyali.
Omupopiliko muuministili womidhingoloko, omakuti nomapashiyono, Romeo Muyunda okwa ti, nonando iiningwanima mbika ya li tayi shuna pevi omimvo dha zi ko, nuumvo otayi indjipala.
“Momumvo nguka awike, oompanda dhi li 48 odha adhika dha sa koofalaama dha ikalekelwa oshowo komahala hoka dha gongelwa,’’ ta fatulula ngaaka.
Ta ti, omwaalu ngoka ogundji noonkonkondo, moomwedhi ashike ndhoka dha piti, netokolo lyomeendelelo okugamena oompanda otali ka ningwa.
‘’Oompanda 48 ndhoka dha li dha dhipagwa, odhi vule nale dhomimvo dha piti, nonando omumvo nguka inagu pwa ko natango. Mo2021 oompanda dha dhipagwa kaashi li paveta odha li 43, oshowo 40 mo2020, komumvo.
Ta gwedha po ta ti, uuministeli womidhingoloko, mekwathelo nelongelokumwe lyopolisi, etanga lyegameno oshowo aakwatheli yalwe, otaya ka nkondopeka omatati gokutula miilonga oveta yegamenenopo lyiiyamakuti, opo uupyakadhi mbuka wu hulepo nenge wu shonopale.
“Okuza 2017 oondjamba dhi li 50 okwa li dha dhipagwa, 2018 odha li 27, 2019 odha li 13, 2020 odha li 12 omanga omumvo gwa yi dha li ashike hetatu,’’ Muyunda ta totha mo ngaaka.
Ta ti, omwaalu ngoka otagu ulike lela gwa shonopala omimvo dha piti, naashoka otashi ulike nkene aagameni yiiyamakuti ya kala taya longo ya itula mo.
Muyunda okwa li a kumagidha oshigwana shi hulithe po okudhipaga iiyamakuti ya gamenwa mEtosha.
“Iiyamakuti ngaashi oompanda, oondjamba oshowo oongaka oonkalamwenyo dhawo odhi li moshiponga oshoka oyo unene hayi dhipagwa omolwongushu yiilyo yawo,” ta ti ngaaka.
Ta ti, nonande ope na egameno lya kwata miiti okukeelela iiyamakuti yi dhipagwe kaashi li paveta, natango oshigwana ohashi kambadhala okulongitha oompito adhihe, okukonda ooveta ndhoka.
Sha ikolelela kiikundaneki yilwe, omutamanekindjayi Martha Imalwa okwa popi kutya iikoya kombinga yiiyamakuti moNamibia oya kala yi li pombanda noonkondo noshinima shoka oshe eta eikwato pomutima kombinga yegameno lyuutshitwe woshilongo oshowo eyonagulo lyomidhingoloko.
Pethimbo ta popi pomutumba ngoka, Imalwa okwa popi kutya otashi kala owala nawa uuna aantu ayehe ya longele kumwe okuvudha mo iimbuluma tayi longelwa iiyamakuti.- vkaapanda@nepc.com.na