Charles Ndeumane

ONGWEDIVA – Ngoloneya gwoshitopolwa shaShana Elia Irimari okwa indile uuministeli wuunamapya nuuniimuna, omeya netululo lyomavi wu ninge onkambadhala yomeendelelo opo wu patulule okatomeno kOshakati Eloolo oshowo AMTA Meat Processing.

Irimari okwa popi ndhoka pepatululo lyoshigongiilonga shuule woshiwike shaanambelewa aakuluntu muuministeli wuunamapya nuuniimuna, omeya netulululo lyomavi mombelewa yelelo lyondoolopa yaShakati. Uuministeli ota wu ningi oshigongiilonga shoka opo wu tale nkene we shi enditha moopoloyeka nomathaneko gawo metatamumvo lyomvula ndjika wo wu tale mpoka wa pumbwa okuninga omalunduluko. 

Irimari okwa ti oku patulula uutomeno mboka ota shi ka pa aanafaalama yomonooli ompito yoku landitha iimuna yawo opo yam one iiyemo. “Uuministeli wuunamapya nuuniimuna owuna oshinakugwanithwa sha simana oshoka owa kwatelamo iipambele ayihe ya guma omwenyo ngaashi omeya, uushitwe noshotuu. Ota ndi indile opo uuministeli wu tule miilonga epatululo lyuutomeno mbuka uyali, Oshakati Eloolo oshowo AMTA meat processing, oshoka otashi ka eta oompito dhiilonga noku yambula po omahupilo moshitopolwa,” osho Irimari a popi ngaaka.

Omukuluntuwiliki guuministeli wuunamapya nuuniimuna, omeya netulululo lyomavi Ndiyakupi Nghituwamata okwa ti uuministeli otawu ningi ashihe shoka tawu vulu opo wu patulule uutomeno mboka mbala ngaashi ta shi vulika. “Manga tu li moshitopolwa ota tu ka talelapo oopoloyeka adhihe dhuuministeli mwa kwatelwa uutomeno mboka. Ota tu kambadhala oku wu patulula mbala ngaashi ta shi vulika,” osho Nghituwamata a ti.

Okatomeno kOshakati Eloolo okwi li ka patululwa ishewe momumvo 2020 konima sho ka li ka patwa momumvo 2016, ashike oka pata ishewe momumvo 2022.

mrndeumaneraycharles@gmail.com