Auleria Wakudumo
Vamwe vomounona vomunangeshefa Frans Aupa Indongo ova holola tava ti oFrans Indongo Group oye va patela kondje okukala oilyo ile okumona oilonga meengeshefa daxe.
Ova holola yo kutya elelo leengeshefa di li koshi yoFrans Indongo Group otali ningi omatokolo itaa wapalele nokukwatela po ongeshefa yaxe monakudiwa.
Simeon Indongo oo ta ti okwa kalela po ovamwaxe ve li 43, okwa holola ehandu ta ti nonande vati ve li 19 kave na oilonga ile oyuuyemo ya wedwa po, vati oFrans Indongo Group inai va pa nande oilonga nande vamwe ve na ngaho eedjapo nowino moilonga ya faafana noilonga hai longwa meengeshefa daxe.
Indongo okwa weda po ta ti elelo loFrans Indongo Group otali longifa ouvela waxe womoukulupe okuninga omatokolo oo ta ti amwe inaa pitikwa vati kuxe notaa ka tula ongeshefa mowii.
“Tate oku na ounghundi wopamadiladilo nefimbo limwe oha nyengwa okudimbuluka novana nokuli.
Paife otava longifa ounghundi waye okuninga omatokolo shaashi ita dimbuluka sha vali, yee ita dulu okuninga omatokolo kuye mwene,” Indongo ta ti.
Indongo okwa twikila ta ti vati ava ve li melelo leengeshefa daxe ova li va kumaidwa komunashipundi a li ko nale, Frans Ndoroma opo va ninge oilyo nokukala ve na ewi moinima yaxe ashike inava hala oku shi ninga.
Umwe womounona, Engelberth Indongo okwa weda po ta ti okwa li e li mongeshefa naxe ashike ava ve li meni inava hala vati oku va tula mo.
“Eengeshefa datate odi na ovanailonga ve dule 2 500 ashike nande oumwe ngaho e li mo ta longele xe, kutya nee pamwe oilonga yokukomba ile okukosha oudjuo,” tava ti. Ounona ova lundila elelo leengeshefa daxe vati tadi twikile okulonga nonande eekontalaka davo da pwa ko.
Ova holola kutya vati kape na ou ta tula ko elelo lipe shaashi omutotipo wongeshefa ke li monghalo tai dulu okuninga omatokolo.
“Ova landifa po omatungo nomaliko mEenhana, Outapi, nOshikango ndele tava ongele eemiliona N$60 okupatulula oIndongo Ford. Indongo Ford okwa kala po ashike oule wodula ndele ta pate. Ova twikila nokulandifa ofaalama ya li koTjiwarongo,” tava ti.
Vamwe kave shishi
Nande vamwe vomounona va holola eudonai kombinga yeengeshefa daxe, vamwe ova ti kave shishi ngeenge eengeshefa daxe otadi lelwa nai ngaashi tashi popiwa. Ova weda po tava ti kave na ouyelele wa wana kombinga yoshinima osho, onghene itava dulu okutya ko sha.
Frans Indongo Group
Mekwatafano naKundana, Frans Indongo Group oya holola kutya itai nyamukula omapulo taa dilile kounona vomunangeshefa shaashi vati ove na nale oshibofa shi li komhangu yopombada nounona vaye. “Ofrans Indongo Group oyi na oilyo yelelo ya tulwa po paveta okulela nokuninga omatokolo ongeshefa, ya hoololwa komutoti wongeshefa yeemwene tatekulu Frans Aupa Indongo,” oilyo tai yelifa. She likolelela kehangano, Frans Indongo vati nghee a kala iha tula ongeshefa yaye mumwe noinima yovakwanedimo vaye ile nonghalamwenyo yaye yopaumwene okukwatela po vati ongeshefa yaye mohainga.
“Oohandimwe ava ve na owino yopombada ovo va ningwa oilyo yelelo leengeshefa daye okulela nokukaleka po eengeshefa daye,” ehangano loFrans Indongo Group tali ti. Ova weda po tava ti omatokolo aeshe haa ningwa koilyo yelelelo ohaa kundafanwa koilyo aishe okukwashilipaleka exumokomesho longudu.