Auleria Wakudumo
Oshikango – Ongudu yovakalimo vomOshikango, Ondobe nomikunda dopopepi, oya tula mo omunyanyo wopambili, tai pula epangelo li tule oteya kokapate komamanya oko ka dja kOshikango kayuka kOndobe.
Ovakwashiwana ova holola kutya ova kala va teelela nokulididimikila epangelo li longe okapate aka, ka ninge opate yoteya, ya kwatakanifa Oshikango, Ondobe oshoyo omikunda dopokati dihapu ashike kemaya kudj’odwi.
Ova ti okapate ka keli vali monghalo ili nawa neetuwa davo vati otadi ningi oikwakwa molwa omalambo nongwalungwalu yakeshe efiku yokapate.
Omupopiliko wongudu, Gabriel Jeremia okwa holola kutya ohava mono oixuna okushinga kokapate unene pefimbo lodula.
“Ka tuna nghee shaashi oyo ashike opate hai longifwa kovanhu aveshe pokati kOshikango fiyo Ondobe,” Jeremia ta ti.
Jeremia okwa ti eeambulasa neetuwa dopolifi ihadi fiki diva poshiponga ile poshiningwanima shonhumba molwa onghalo yokapate osho hashi tula eenghalamwenyo dovanhu moudjuu.
Ongudu yovakwashiwana oya holola yoo kutya oihauto ohai ningi ondwi ihapu ngeenge tai shingwa kokapate, osho tashi eta omhepo ya kaka mewangadjo novakwashiwana unene ovo hava di popepi nopate va kale moshiponga shokufudila mo ondwi keshe efiku.
Okapate aka inaka kwatakanifa ashike Oshikango nOndobe ndele oka kwatakanifa omayakulo oshiwana mahapu ngaashi eefikola, ouklinika neembelewa depangelo.
Oka kwatakanifa eembelewa dihapu ngaashi Ombelewa wounamapya mEdundja, ombelewa yakansela waShikango, oshipangelo Odibo Catholic, osekundefikola Odino St Mary, ofikola Odibo Combined, Onengali Combined, osekundefikola Edundja, ofikola yopedu yaDundja, okakilinika kaDundja, ofikola yopedu Tuyoleni, Etomba Combined nOshitutuma Combined nenhele dikwao da wedwa po.
Omunashipundi nomupopiliko wongudu okwa ti ngeenge okapate oka ningwa epate yoteya, epangelo ita li ka hepeka nokulongifa oimaliwa ihapu mokututila alushe omadu ile omamanya kokapate noku tuma oombakumbaku va kale tava longo okapate.
Okapate aka ohaka yi oilonga yopolifi moshipala unene ngeenge tava longele kumwe kopolifi yaAngola shaashi okay a fiyo okeengaba daNamibia naAngola.
“Opolifi fimbo limwe ohai nyengwa okufika diva koshiningwanima sha ningwa lwokeengaba molwa onghalo yokapate,” Jeremia ta ti.
Okwa ti ngeenge okapale oka ningwa oteya nena opolifi itai kala vali ina omalipopilo kutya ova latekwa kopate noiningwanima ihapu hai ningwa keengaba otai ka kandulwa po.
Ovakwashiwana ove udite kutya ngeenge okapate oka ningwa oteya, nena ovataleli po navo otava kala vena ohokwe yokutalela po omidingonoko davo, okuyambula po eengeshefa nokuyandja oilonga ihapu kuvo.
Ovanyanyi ova yandja ekemo lavo kuKansela woshikandjohololo shaShikango, Esther Nghidimbwa The group submitted their petition to the Oshikango Regional Councillor, Ester Nghidimbwa.