Matheus David
Ehangano loKwafela Oshiwana Foundation olo la ndulukilwe momudo 2020 ola pewa omapya e li 32. Omapya okwa yandjwa kovaleli vopamifyuululwakalo, opo a dule okulimwa, mo mu dje oipalwifa oyo tai xupifa oshiwana pomafimbo omaudjuu.
Paulus Kornelius oku li omutotipo wehangano Kwafela Oshiwana Foundation, okwa ti ehangano eli ola totwa po nelalakano lokukwafela oshiwana osho shi li ilo tashi ke lihanga shi li monghalo itai nuwa omeva.
Ehangano eli ola kwafela oshiwana shomOmbaye pefimbo loCovid-19. Kornelius okwa didilika nghene elelo lyUukolonkadhi, Oukwanyama, Ombadja, ngoloneya waHangwena naaveshe ovo va tondoka onghuwo ei, mokuyandja oufila, omaadi, oinguma,osho yo omatanga.
Ovanangeshefa ohava yambidida oproyeka ei pakuyandja oyeendifo, ovashingi vomakalu osho yoo omaahooli. Kombinga ikwao, ovahongi, ovapangi osho yo Ovanamibia vamwepo ova didilikwa va yandja oidjalomwa noipumbiwa ihapu.
Monena ehangano eli otali pula komesho kakele ola didilika omhumbwe yoilongifo, nomatuwa okutwala ovaliyambi ava ve na ohokwe noshisho shokulonga momapya a yandjwa.
Ben Mulongeni oku li hamushanga mehango eli. Okwa ti ehangano kali na mwene , ndele olOvanamibia konduko. Okwa ti efaneko lehangano eli okukwafela oshiwana osho sha dengwa komundilo, kefundja ilo koshikukuta.
“Ehangano kali lile po okuliyambapaleka, ndee okuyandja omakwafo koshiwana,” Mulongeni ta ti “Shamha oshilongo sha dengwa kuNakaidi kaHalweenya, ohaluka epangelo to udu tali yelifa kutya China ilo Africa okwa yandja oipalwifa kuNamibia. Omolwashike itatu limi ndele hatu pungula oipalwifa yetu vene manga tu na omuloka uli nawa?
Mulongeni okwa ti enenenedilaadilo loproyeka okulima omapya, okuwapaleka meenhele ngaashi eefikola, oipangelo osho yo meedolopa. Eshi otashi ningwa opo tu keelele eembakiteli nomauvela oo hae uya ongoshidjemo shekako.
“Ohatu indile epangelo osho yoo ovanangehshefa ve tu kwafe ngaashi va dja no ku shi ninga opo tu dule kumona omambakumbaku okulima omapya, oyeendifo yokutwala ovanailonga komapya oo adidilikwa eli mOkongo, Ohamilema neenhele dikwao.
Keshe ou te ke lihanga e li monghalo yokukwafela oshiwana ota indilwa a kwatafane naPaulus Kornelius konomhola yongodi 081 204 2231.