OMUTHIYA-Vahameni vanare wombunga zoRally of Democracy and Progress (RDP) kavayalipakerere hena kombunga zaSWAPO, posigongi sosinene kasikereko mosikondovike. Ogu kakere tagendesa mbunga ezi zokukatengura, kakere silyo sokomitiye zontjimantjima zaRDP Moses Amukoto, ogu katanterere mbunga asi awo vana hafa mokutengura kombunga zaSWAPO. Gumwe gwawo kakere Hilya Kamati, mutungi gatunga pevango avatumbura asi King Kauluma, ogu katente asi age kwazire moRDP mo2007, nye ngesi kuna kamona asi yininke kapi yina kugendapo nawa yiyo vana tokora kutengura kombunga zaSWAPO yipo vayatwikire kutunga sirongo sawo noukumwe.
“RDP mbunga zoumbondo, manifesto zawo kapi zina kutanta Yuma, yipo asi momukunda Oshikoto kapi muna kara hepero asi tukare nonombunga dononzi, ose ngesi vape moSWAPO, yipo asi kuna tokora kukwama eyi ana kurugana SWAPO tuze komeho. Awo kavatambwire Presidentegona gombunga zaSWAPO, ndokotora Hage G. Geingob, ogu kapandwire vahameni ava wovape asi vana rugana nawa mokudimburura asi mbunga mpangeli kunakurugana yininke yoyiwa.
“Embo nkenye apa kukara embo”, nampili ngano koure ono zi, hawe nyove kukatengura oyalipakerere nekoro lyoge mompora”, Yimo ana kutanta Geingob apa ana kutambura vantu ava vana kuyalipakerera hena.
Geingob simpe katente asi manifesto zoSWAPO kapi zina kugava etumbwidiro ngali pira kusikamo, nye kuna kufaturura asi yinke twarugana nomvhura 24 nomakwedi aga ntani yinke eyi tuna kukarugana komeho oko, kuwapayika ekonomi ntani kutwara nye komeho ugawo waNamibia mekuliko olyo vana pumbwa vantu.Geingob simpe kagwedereko asi mbunga zendi zelike zina kara asi noudivi woupolitika nokugusapo maudigu geparu gana kuguma vantu vetu.
“Nsene koveli vamwe vanakuuyunga asi epangero kwato eyi lyarugana, vaporosi vahepa kukwata muntu gwangoso vamutware kodorongo morwa mwato usili moyo ana kuuyunga.