Auleria Wakudumo
Ehangano loNamWater ola kunghilila ovakwashiwana vopomikunda da dingilila Ombafi nOgongo opo va xulife po okukufa omeva nominino mokanala vea yukifa moshana.
Omupopiliko woNamWater Lot Ndamanomhata okwa ti ova didilika ovakwashiwana tava kufa omeva mokanala nominino da yuka moshana opo vati va tule omeva moshana nelalakano okukwata eeshi.
Otaku hokololwa ovakwashiwana tava tutile omeva moshana shili popepi nokanala opo eeshi dihapu di dje koyana imwe do di fike popepi navo.
NamWater okwa holola kutya ekufo lomeva mokanala oko ke li pokati kOgongo nOshakati ola shunifa pedu ekunguluko lomeva didwa oku ya keendama oko taa ka dindwa.
Ka kele kokutula ominino mokanala, Ndamanomhata okwa weda po ta ti ova didilika yo ovakwashiwana tava mbonyona okanala opo omeva a kunguluke mo a uka peenhele odo va hala.
“Eshi otashi nyono omutungilo wokanala, ka mbonyoke po ndele taka kala ihaka
longifwa monakuiwa. Ohashi pula yo NamWater oshimaliwa shihapu okulongolola okanala ngee ka nyonaunwa kovakwashiwana,” Ndamanomhata ta ti.
NamWater okwa didilika ovakwashiwana hava kufa omeva mokanala shi heli paveta unene pefimbo lodula.
Ndamanomhata okwa fatulula kutya ova kala nokundungika oshiwana kombinga yokukufa omeva nokulafulula okanala ashike ovakwashiwana otava twikile ashike okukufa nokuteya okanala.
“Etanga leameno ola pula NamWater a yandje ombapila tai ulike kutya okukufa omeva mokanala inaku pitikwa paveta opo li katuke onghatu,” Ndamanomhata ta ti.
NamWater ota indile ovaleli vopamufyuululwakalo, oovene vomikunda va kunghilile oshiwana opo shi xulife po oshinima eshi.
Otava indilwa va lopote keshe ou ta hangika ta nyonauna ile ta kufa omeva nominino a ukifa moshana kopolifi ili popepi naye ile kehangano loNamWater.
“Okukufa omeva ngaashi tashi ningwa nominino inashi pitikwa nohashi pula odilo okulonga okanala ka panunwa kovakwashiwana shaashi va hala okulonga oilonga yavo yopaumwene. Omeva ohaa longifwa kovakwashiwana va hapu novakwashiwana va hapu otava ka kala vehena omeva ngeenge a pate,” Ndamanomhata ta ti.