SIVARA-Moomu tupu zina kutameka mvhura kuna kuroka, moKavango zoutokero ntani vantu ngesi vana tameke kupurura. Apa nye sayitunga zaNew Era kazikadingwire nomukunda dimwe moKavango zoutokero, kkatukauyungire nagumwe gatunga pomukunda Sivara, koupumezuva waNkurenkuru nokm 83, omu katupulire Monika Kantikili namugara gwendi Justinus Haingura awo kavatente asi vana tameke kupurura mapya gawo, moomu tupu zina kutameka mvhura kuroka. Ose kwatameka paapa tupu zitameka kuroka ntani ose kwagwana mvhura zongwa, eyi nye yatuninkisa asi twahepa kulima nye mapya getu nagenye gavali yimo ana kutanta Monika morukwangali.
Ose natuvenye kwato ogu arugana,yipo nye asi twahepa kupurura, yipo asi tukare nonondja dokulya yimo ana kutanta mugara gwaMonika. Momukunda gwaKavango sinzi sovanafarama kupurwisa nohove vazangure mahangu nepungu nokuruganesa vantu vakune nombuto. Sinzi sovanona kuvatera vakurona vawo mokupurura ntani navamwe ava aturere. Ose kuna kuyihuguvara asi namumvho tatuyidaya. Yimo ana kutanta Haingura. Awo kuna kara tupu nowoma wouyiumbumburu yokulya nombuto. Mvhura kazipwire kapi twazangwire nawa ntani yimbumburu nayo tayihomoka nokuyalya nombuto detu. Ano ose kuna kuyimona asi namvho nayikara namo peke, yimo ana kutanta Monika nokugazara asi mvhura namumvho taziroko zongwa. Awo kavatente asi nampili ngomu vana kupurura hawe awo ngava hageka nakauke moutano yipo vaze vakahorowore. Ose ngatu za tukahorowore, oyo kunakara asi simwe somulyo ngaturugana. Vantu vahepa kuza mounzi wawo yipo vakahorowore mbunga politika ezi vana hara ndi vapura asi zawo. Eyi kuna kara mulyo kosirongo setu yimo ana kutanta Monika namugara gwendi Hainguara