Taimi Haihambo

Opolifi oya lopotelwa oibofa yovanhu ve li vane va lopotwa ve likufa eemwenyo momukalo welimangeleko mexuliloshivike koitukulwa ya yooloka meni loshilongo.

Moshiningwanima shotete omwa lopotwa Martin Johannes weedula 29, e limangeleka konima vati eshi va li tava tanguna nomunashilonga pamwe naye poundingosho molwekaya lo-N$1.  Johannes vati okwe ke lituwa momuti ongula e limangeleka nepaya laye lomoshiya.

Moshiningwanima sha yooloka natango omwa lopotwa Benedictus Johannes Hanse oo e lituwa e limangelekela meumbo laye.  Omuhona wokoilonga yaHanse vati okwa li a limbililwa kuHanse oo e lixula koilonga vati Etitatu, vo novapopepi nae ove mu lixula Etitatu. 

Konima vati okwa panga omhangela opo a ye keumbo laHanse e ke shi pwiikine. Eshi a fika vati okwa kundwa kedimba lidjuu tali di meumbo laye. Eshi a hondamena pekende, vati okwa mona Hanse e limangelekela monduda yaye yokunangala.

Moshiningwanima shikwao vati oHerman Amunyela Abel omunamido 41, oo a hangika kukaume kaye kapaihole e limangelekela monduda yaye yokuhiila. 

Moshiningwanima shotete omwa lopotwa Salomo Nanye Ndimunhu omukalimo waNdola moshitukulwa shaHangwena a hangika e limangelekela mepya.

Natango opolifi oya lopota Toini Nangula Iita, omunamido 23 okwe lituwa moshilandopangelo e limangelekela momuti.

Omupopiliko wopolifi moNamiba Kauna Shikwambi okwa ti ovapambele voonakufya aveshe ova shivifilwa, nomalutu avo okwa twalwa keekila depangelo, oko omakonakono opolifi taa ka twikila. Shikwambi okwa twa ovakwashiwana omukumo, opo va kale hava kongo omakwafo manga inava kwatwa komadiladilo okulimangeleka shaashi hasho ekandulepo loupyakadi.

-taimihaihambo2000@gmail.com