Taimi Haihambo
Moshitukulwa shaMusati omwa teelelika mu ka dje ovaulikwahoololwa vatano vongudu yoAffirmative Reposition (AR), ovo tava ka kalela po ongudu momahoololo oukansela, oo a teelelika a ka kale ko muNovemba neudo. Omupeduminista wongudu yo-AR moshitukulwa Petrus Shiweva okwa ti ava tava kufa ombinga momahoololo oukansela ove na mo ashike Michael Aitembu, oo ta ka kondjela shipundi shoukansela moshikandjohoololo shaOutapi, osho yo Petrus Nangolo oo ta ka kondjela oshipundi moshikandjohoololo shaEtayi. “Ovaulikwahoolowa venya vatatu otava ka kufa ombinga komalelo eedoolopa ngaashi odoolopa yOutapi, Oshikuku osho yo Okahao,” ta ti. Shiweva okwa ti o AR ota yi ka hovela okuninga oikonga yavo yomahoololo okudja mefiku 1 Novemba. Okwa ti otava ka ninga oihongi momikunda osho yo momaumbo koumwe noumwe.
Okwa twikila kutya natango ove li tava tula omalongekido okutala nokushiiva apa tapu ka kala oushina vokuhoolola meni loshitukulwa.
“Eshi ohatu shi ningi shaashi otwa hala nale tu konge nokudeula ava hatu ka tuma va ka talele omahoololo, vo va dule okumona kutya omahoololo okwa ningwa moshili nomouyuuki,” ta ti Michael Aitembu umwe womwaava tava ka kufa ombinga komahoololo aa okwa ti, ye opo lotete ta kufa ombinga momafiyafano oludi eli nokwe lineekela kutya oku na oku na oku shi endifa nawa.
Okwa ti yee ngeenge okwa pewa omhito, tete okwa hala okudimbuluka oilema moshitukulwa. “Ovanhu ava ve na oulema moshitukulwa otava mono oixuna shaashi ohava fyaala po keemhito dihapu,” ta ti.
Okwa ti okwa hala ngeno va mona endiki lavo, omu tava mono okukala hava pewa omadeulo moinima ya yooloka.
Okwa twikila kutya natango okwa hala oku ka kwata koikondo ngaashi eepate di ye popepi neefikola, omalushenpo a andjakanifwe moshitopolwa, onetwork keenhele dokoushai osho yo ehapupalifo leefikola dopaungoba.
“Natango onda didilika omadiva a filala, nohaa kala ekwafo kovanhu vahapu, oo a pumbwa okukala a lafululwa nokufilwa oshisho efimbo alishe,” ta ti. Aitembu okwa indila aveshe ava ve na oumutwe vomahoololo va fye oshisho kutya ova kufa ombinga, shaashi ei oyo omihito yavo yokuninga omahoololo aa va hala.
-taimihaihambo2000@gmail.com