Omulumenhu weedula 51 ota holoka nena momhangu yamengestalata waKahao eshi a xwikwa po ondingosho yomukainhu womushiinda shaye.
Oshiningwanima osha ningwa Omaandaha efimbo lokomatango keendingosho Oushakeno komukunda Ondjungulume, moshitukulwa shaMusati.
Omukulunhu wopolifi moshitukulwa shaMusati Commissioner Ismael Basson okwa koleka oshiningwanima eshi.
Opolifi oya hokolola tai ti omufekelwa okwa li ta tanguna nomukulukadi waye efiku olo keumbo lavo.
Otaku hokololwa kutya omufekelwa nomukulukadi waye ova ka ya keendingosho. Opolifi oya hokolola tai ti omufekelwa okwa li e li vangeka ta ti omukainhu waye okwa ka lombwela vakwao kutya okwa li tava tanguna keumbo.
Vati omufekelwa ohava tunguna shito nomukainhu waye osho yo okulidenga.
Otaku hokololwa kutya omufekelwa okwa tameka ta ufana omukainhu waye kutya na dje po pondingosho opo ashike mwene wondingosho okwa ti ina dja po.
Opolifi oya hokolola tai ti omufekelwa namwene wondingosho ova tameka okutanguna.
Vati omufekelwa okwa kufa okapalwa ndele ta tomeka ondingosho yamukwao omundilo.
Omwa pila oilandifomwa aishe i li pongushu yoshimaliwa N$2 000.
Opolifi oya ti mondingosho omwa hangika yo natango eeshako doilya daumwe wopomukunda wavo.
Opolifi oya kumaida oshiwana opo shi xulife po okutanguna ngeenge shi li keendingosho ile sha nwa omalodu shaashi osha nyika oshiponga.