Auleria Wakudumo
Ovakainhu vatatu ova weda komivalu doihakanwa yomahepeko ounona novakainhu nova patulula oibofa, omo umwe a shashalwa nomakatana.
Otaku hokololwa omukainhu weedula 42 e li monghalo ii eshi a ponokelwa nokushashalwa nekatana komufekelwa vati ehe shivike, ashike ina tumbulwa kedina.
Oshiningwanima eshi osha ningilwa momukunda Okafitukafimbi mOutapi.
Otaku hokololwa omukulukadi a li ta di meumbo a uka kolukanda hali ifanwa Eengolo eshi omufekelwa e mu ponokela nekatana, noku mu shashaula olutu alishe.
Omufekelwa vati okwe mu ningila yo omatilifo kutya ote mu dipaa.
Opolifi oya holola kutya omufekelwa okushivike ashike ina tulwa natango moipandeko.
Oshiningwanima shimwe, opolifi moshitukulwa shaTjozondjupa oya tula moipandeko omulumenhu weedula 41 eshi vati a ponokela nokuningila omatilifo kutya ota dipaa kahewa kaye komoihole nale.
Oshiningwanima eshi osha ningilwa molukanda hali ifanwa Promised Land mOkahandja, sha ningwa Olomakaya lwopo 23h00.
Otaku hokololwa omulumenhu a ya keumbo lakahewa kaye kopaihole nale, ta fange po omivelo opo a yeululwe nokuningila nakuningwa oshihakanwa omatilifo kutya ote mu dipaa. Omufekelwa okwa hangwa kopolifi e na ombele.
Oshiningwanima shimwe, omulumenhu weedula dihe shivike okwa tulwa moipandeko eshi vati a denga kahewa kaye kopaihole kwa li.
Oshiningwanima eshi osha ningilwa molukanda Ekunde mOkahandja.
She likolelela kolopota yopolifi, omulumenhu ou vati okwe ya kondunda yakahewa kaye wopaihole kwa li ndele te mu denge neengonyo moshipala.
Omupopiliko wopolifi, Deputy Commissioner Kauna Shikwambi okwa koleka oiningwanima ei.