Auleria Wakudumo
Ovashingi vaYango monooli ova holola kutya otava mono oyuuyemo ya wedwa po okudja mongeshefa ei.
Ongeshefa ei inai etela ashike ovashingi voutaxi ouwa, ndele oya yandja yo omhito kovanailonga ovo ve na eetuwa dopaumwene ovo va hala okumona okafilinga ka wedwa po. Ndilimeke Joseph oo e li omuhongifikola okwa holola kutya okwa shangifa otuwa yaye oyo opo ya di moipakete nokuli opo a mone mo okafilinga kopomunghulo. Joseph okwa ti nonande Yango opo ya hovele monooli, ovanhu vahapu ove na ehalo lokulongifa Yango molweameno.
“Ovanhu vahapu ove na oumbada wokulonga meetaksi keshe molwaashi oimbuluma yoomeetaksi ya indjipala,” Joseph ta ti. Nelson Nghishidimbwa oo naye e li omuhongifikola okwa holola kutya oha shingi ashike ngeenge a kutuka koilonga yaye yefiku keshe.
Nghishidimbwa okwa ti okuhole okushinga oufiku molwaashi ovanhu vahapu ohava longifa Yango oufiku.
“Ovanhu vahapu paife ove na oumbada okulonda meetaksi unene ngeenge tava di keenhingo doufiku. Efimbo eli ola wapala okukala u li mopate opo u dje mo nokafilinga ka kola,” Nghishidimbwa ta holola.
Thomas Nghiyalwa nedina la shiivika nawa CJ mopate okwa ti nonande e li omushingi woutaksi nale, okwa ninga etokolo opo e lishangife Yango. Okwa ti oha kala ta felefula, yee ta longifa ngaho Yango ngeenge pe na ovatwaalelwa ve li popepi naye.
Nghiyalwa okwa holola kutya nonande ta ningi oshimaliwa, ofuto yaYango ohai kala i li pedu efimbo limwe unene ngeenge ovanhu ovahapu, vo ova uka popepi. “Ngeno okwa li ha wedele oshimaliwa she likolelela kutya ovanhu ove li vangapi, nena ohatu likola mo shihapu shi dule eshi hatu di mo nasho paife, ”Nghiyalwa ta ti ngaho.
Ovashingi vaYango ova holola kutya nonande va pandula eshi tava mono oyuuyemo ya wedwa po, ova taalelwa komashongo ahapu. Ovanhu vamwe ohava tula mo eindilo laYango shaashi ashike va hala okutala vati ngeenge Yango ota longo ngaho paushili.
“Ohandi dimbuluka nda shinga fiyo opeumbo lomutwaalelwa wange ngeno naashi nde ke mu dengela nda fika okwa pa nge ashike ombili nokuholola kutya okwa li ashike ta tale ngeenge ota longo,” Nghishidimbwa ta dimbulukwa ngaho. Ovashingi ova holola yo kutya ovanhu vahapu ohava tula mo omaindilo ashike eshi omushingi ta ka katuka ile ta ka tambula eindilo olo, vo otava ninguluka vati inava hala vali. Ova holola yo kutya ove na oudjuu wokaalita kaYango konooli shaashi ihaka ulike eenhele dihapu oko ovatwaalelwa va uka. Ova ti ohashi kala shidjuu oku ka tala ile okutwala ovatwaalelwa vavo shaashi ove na manga okupukululwa ngeenge onhele oi li kokule.
Eshi ova ti ove wete tashi nyokoma shaashi ohava pewa ashike ofuto ya valula onhele oyo omunhu a tula po she likolelela kokaalita nonande omunhu ta yi meni kokule. Yango monooli okwe ya mo omwedi wa dja ko noku li meedoolopa ngaashi Ondangwa, Oshakati nOngwediva.