OSHAKATI – Gumwe gomaapambele yomukiintu ngoka ta tamanekelwa ekambadhalo lyedhipago lyaakwanambwiyu yoomwedhi omugoyi, okamati nokakadhona, okwa hokolola nkene a kala a taalela omahepeko megumbo.

Theresia Johannes gwomimvo 24, oshiwike sha zi ko okwa mangwa po kopolisi moshitopolwa shaMusati sho a li u umbile aanona ye yaakwanambwiyu metale lyomeya, komukunda Omutundungu kOkalongo.

Omukwanezimo ngoka edhina lye lyi shiwike kuKundana okwa hokolola kutya, Johannes okwa kala a taalela onkalo ondhigu omanga inaa ninga oshiningwanima shoka, nonando omadhiladhilo ge oge li pehala ngaashi ge na okukala, pampito yimwe otatu fekele ga nkundipalekwa konkalo a kala muyo. “Johannes okwa thigwa po omushona lela kuyina sho a hulu ko, okwa kala metonatelo lyayinakulu, omumwayina gwayinakulu ngoka a vala yina, ihe okwa kala ta hupu shokadhila oshoka ekwatathano lyawo nayikulu ngoka, inali kala ewanawa nando,” ta hokolola ngaaka. Ta ti hako okupopya nayi, ihe omukulupe ngoka okwa kala ta ningi omutekulu gwe onyanya, iha pewa okulya, omalimba giikulya otaga patwa, nonando e na ohaanona ndhoka, okwa kala unene ha pewa okulya kaasinamutimahenda.Ta popi kutya, okwa kala nokuningwa nayi megumbo, ta dhengagulwa. “Oshikando shimwe okwali handi zi naye, omolwonkalo nda mono e li muyo, ihe okwa li ye mu ile ko noku mu dhengagula. 

Okwa li nde shi lopota kopolisi naakwanezimo mboka ya li ye mu dhenge okwa li ya mangwa po,” ta hokolola ngaaka.

Omukwanezimo nguka okwa ti, onkalo inayi kala nando yi li nawa komukiintu ngoka, oku shi oku yi hokolola.

Ta ti, esiku ndyoka a ekelehi oohanona dhe, otaku hokololwa kutya okwa li ya nyenyeta nakuume ke kopayihole, nokuza mpoka okwa li a tokola oku ka ekelahi oohanona dhe.

“Elago enene, okwa li a monenwa ko kokamati hoka komimvo 16, Cornelius Shimwaafeni sho ka li ka dhimbulula kutya Johannes keli nando monkalo tayi hokitha. 

Oka li ke mu pula kutya oshike te ende naanona e ya kwiinina momukalo gu li ngawo, ihe anuwa ine mu yamukula, shoka okwa li sha hili Shimwaafeni noku mu landula,” ta popi ngaaka. Okamati hoka oka li ka mono nkene Johannes ta ekelehi aanona, e taka nukile momaeya nokuhupitha aanona mboka.

Omukwanezimo ngoka okwa ti ota pandula okamati hoka omolwiilonga ka longo okuhupitha oomwenyo dhaanona mboka.

Ependafule

Omupresidente gwoshilongo Netumbo Nandi-Ndaitwah esiku kwa li kwa ningwa oshituthi shomagongo kUukwambi Olyomakaya, okwa popi komeho goshigwana kutya, okwa li a gumwa komutima omolwetokolo lya ningwa kuShimwaafeni, okuhupitha oonzigona dhaKalunga, onkene okuza esiku ndyoka Shimwaafeni ota kala ta ithanwa ongependafule.

“Sho a li a pulwa kutya, sho wa nukile momeya moka, kawa li wu na nomwenyo goye? Okwa yamukula nondjungu kutya , okwa li nda tokola okusa pamwe nawo. Shoka osha enditha omwenyo gwandje, onkene noonkondo ndi na ongOmupresidente gwoshilongo shika, Shimwaafeni ota ka yelwaayelwa nokwiithanwa ongependafule,” ta popi ngaaka. Omutse gwoshilongo Nandi-Ndaitwah okwa ti, otashi pula omikalo, ohenda nuuntu womuntu opo gumwe a longe oshilonga shoka sha longwa kokamati hoka, onkene oke na okusimanekwa nokupandulwa pashigwana gutya shoka a longo osha simana nosha pandulwa koshigwana a shihe.

Okwa popi kutya esiku ndyoka opo tali kundathwana kaakwanezimo osho wo kepangelo kutya otali ka ningwa uunake, tashi ka ningilwa koWindhoek.

“Otandi kumagidha oshigwana shetu shi hulithe po okulonga iilonga itayi hokitha moshilongo, ihe ya kale nombepo ombwaanawa yuukumwe nohole,” ta kumagidha ngaaka.

Omahepeko

Omukuluntu gwopolisi moshitopolwa shaMusati Ismael Basson okwa koleke kutya omahepeko gaantu momagumbo osho wo omadhipago oga indjipala moshitopolwa.

“Nonando omaupyakadhi ngoka haga holoka, ohaga ningwa kaantu ayehe yomwenyo,” ta fatulula ngaaka.

Ta ti, opolisi oya kala nokukambadhala okugandja omalongo nkene oshigwana shi na okuninga uuna sha adhika komaupyakadhi ngoka taga vulu okweetitha omadhipagathano osho wo omahepeko gomomagumbo.

Linea Silvanus omuhungimwenyo gomomudhingoloko Oshakati okwa li a yi moonkundathana noshifokundaneki shika nokwa li a fatulula nokugandja omatompelo osho wo iiyetithi yiiningwanima yimwe.

“Onda koneke kutya oluhepo nalo otalu dhana onkandangala momahepeko. Unene ngele megumbo kamu na iiyemo ya gwana, ohashi eta omalungwenye, okunyenyeta sigo tashi eta omadhengathano, ngoka haga holoka momikalo dha yooloka mwa kwatelwa okudhipagathana osho wo okumonithathana iiponga osho wo okuningathana onyanya,” ta fatulula ngaaka. Silvanus natango okwa totha mo elongithonayi lyiikolitha.

Ta ti, omahepeko okupitila miikolitha ohaga vulu okuholoka natango pamikalo dha yooloka.

“Ope na aantu mboka haya longo omiyonena konima ya nu iikolotha osho wo iingangamithi oshoka shoka ta ningi, ka vula okuyoolola ngele oshi li mondjila nenge osha puka oshoka omadhilaadhilo okwega nkundipaleka niikolitha nenge niingangamithi,” ta popi ngaaka.

“Oyendji oya taalela omahepeko ga yooloka momagumbo, ihe oya mbandamekwa, kaaya pitithe mo omauyelele ngoka,” ta popi ngaaka.

Ta ti, opolisi oya kala noku kumagidha wo oshigwana shi kale tashi lopota omaudhigu gawo kaahungimwenyo yomikunda oshoka olwindji ohayi longele kumwe naahungimwenyo, mboka oshoka oyo ye na ontseyo nkene nakuninga oshihakanwa e na oku eta uuyelele a wuhe. 

“Okulopota kuyele natango ohaku vulu okukwathela aakonaakoni ya mone uuyelele wa pumbiwa okumona uukwashili moshipotha, opo oshipotha kaashi kane osho wo uupyakadhi mboka wu na okukandulwa po,” ta fatulula ngaaka. 

-vkaapanda@nepc.com.na