Onduba yovanafikola vokoiputudilo yopombada moNamibia oyo ya ufwa okufutilwa koNSFAF ova ninga oule weemwedi mbali va tumba oshinyenu noku lulilwa konima eshi ehangano olo lina oshinakuwanifa shokuvapa okafilinga oku li kwafa komwedi ina li va futa fiyo opapa.
Alushe oshakala omukalo ndjiikile kutya ngeno ovanafikola va kale hava pewa ko olweefo lwotete ngeno mu Apilili.
Paife eemwedi otadi li nanene pumbali ovanafikola inava mona ofilinga yavo yokomwedi okudja koNSFAF.
Laimi Shiwana, oo eli omunafikola koshipitudilo sha NUST okwa ti ye oku li omukalimo waWindhoek ashike ota li tapi.
“Onda ikila ngeno ngaha ondina ngaho okafilinga kange komondjato, taka kwafa nge apa naapenya ndele paife onda ekama ashike,” Shiwana ta holola ngaho.
Okwa twikila kutya ye apa eli okuli po ta futu omuhandjo, novadali vaye havo lela oondiinyaya ndeli hanga. Okwa ti yo monduda yaye oku li mo ta file mo ondjala paife. “Ngeenge ovadali vange va tumu oimaliwa yokufuta onduda yange, iha padulu vali okuxupa oshimaliwa ngeno tashi wana okulanda oikulya. Ngeenge onda lande oukulya ve fike apa, eefewa ita di wana vali,” ta ti ngaho.
Taati Nangolo oo naye eli omunafikola koshiputudilo sha UNAM okwa ti okwa ninga oivike ivali ina ya kofikola paife shaashi kena apa ta hange olefa. “Ohandi xupile ashike muvakwetu ngeenge nde va pula eshi va longwa vo va dule okuendifange po ile va tumine nge oilonga yefiku,” Nangolo ta holola. Nangolo okwa ti ote li longele ouBiochemistry. Okwa ti oilongwa yeifano laye kaifi ipu nande nande.
“Mokufaula kwange luhapu omu, omo ashike momukutula onghalamwenyo yange moupyakadi. Ngeenge onda dopa oilongwa ei, kandi na apa handi ka hanga oshimaliwa shoku li futila oilongwa ei, ngaashi nda nyengwa nale kolefa ngaha,” ta yelifa.
Onghalo ei inai kwata ashike ovanafikola ava kondadalunde ndele oya ya moshipala oilonga yavanafikola vahapu moshilongo.
Vamwe nokuli ove udite oupyakadi molwa omalipulo okudilila keembonge da NSFAF, shaashi ita ku di ouyelele tau holola kutya eshi ita shi futifa ovanafikola pefimbo oshike. Ovakeleli po vovanafikola vakwao moiputudilo ei ova pula NSFAF a yelife kutya omolwa shike inava kundwa fiyo opaife opo va dule okudja mekano omu veli paife.
Kundana okwa ninga onghendabala yoku dengela NSFAF, kombinga yoshikumhungu eshi ashike eengodi davo inadi nyamukulwa pefimbo Kundana a shanga ehokololo eli.
taimihaihambo2000@gmail.com